Пӧръеҥ гаяк тале Лизук кокай

Лизук кокай дене тӱрым тӱрлаш мастар улмыжлан кӧра мутланаш кумылаҥым да уло илышыжым пален нальым.

 

Шернур районысо Чылдемыр ял шотан илемыш пурышо Пӱнчерйымал ял деч рӱдӧ илемыш ныл меҥге лиеш. Елизавета Алексеевна Березина тышке толын каяш чӱчкыдынак пелашыжым йодеш. Ялыште тудым Лизук кокай маныт. «Корно ынде пеш чапле, кудал веле. 2017 ийыште тудым тӧрлатеныт. Пӧрт воктенем машина дене савырнашат асфальтым шарыме», – манеш Лизук кокай. Тудо пенсийыш лектын гынат, шке кундемыштыже эртаралтше ятыр мероприятийыште участвоватла, ондакысе семынак активистке лияш тырша.

Коҥгам шке опта,    пӧртымат чоҥа

 Лизук кокайын кочажым, Николай Айметович Березиным, 1937 ийыште кулаклан шотлен наҥгаеныт. Тунам Лизук кокайын Элека аваже 14 ияш лийын.

«Кочана посна пӧртыш лектын ыле. Мыланна пеш шӱкшӧ тошто пӧрт шоген кодын. Мый дечем 12 ийлан изирак шольым ден авам имньым ончымо орол пӧртыштӧ иленыт. А мыйын пӧрт гыч кайымем шуын огыл: мом муынам, тудым олтенам. Варажым тунем пытарымеке, колхоз пашаш кошташ тӱҥалынамат, правленийыш пӧрт пурам налаш йодмашым возенам. Шке кычал коштынам. Монча пурам Морко район Шордӱрыштӧ муынам. Оксажым колхоз тӱлен. Монча пура дене пӧртым нӧлтенна. Вара адакат монча пурам налын, клатым ыштыме. Тыге оралтым чумыренна: вӱтам, мончам. Эре пӧръеҥ-шамычым йодын омыл, кидышкем товарым налын, мом кертынам, чыла ыштенам. Шольым армийыш кайыме шеҥгеч, пырням локшинчын, капкам ыштенам. Ачанаже авамын шольым дене мӱшкыран улмыж годым, гармоньым сакен, вес ешыш лектын каен. Шкенан ялыштынак илен. Вич йочашт лийын. Ме ты еш дене келшен иленна», – каласкалыш Елизавета Алексеевна.

ТИДЕ УСТА, ЧОЛГА ЛИЗУК КОКАЙ НЕРГЕН 2020 ий 3 январьысе номерыште лудса.