Йошкар-Ола-Зеленый Дол кугорнышто, Волжский районысо «Кичиер» санаторийыш пурымо савыртыш тураште шогышо шордылан памятникым олмыктеныт.
Памятникын шапалгаш да шаланаш тӱҥалмыж нерген кодшо ийын 8 ноябрьыште лекше «Кугарня» газетыште возенна ыле. Чолга лудшыеҥна Ю.Петров санаторийыште канен толмыж деч вара ты шӱлыкан сӱретым шке серышыштыже чон коржын ончыктен. Тудым газетыште савыктыме деч вара редакций лӱм дене республикысе Кугыжаныш пого министерствыш экшыкым тӧрлаш йодын возенна ыле. Тушечын налме вашмутышто рашемын: памятникын «озаже» уке, тудо нимогай организацийын балансыштыже огыл.
Тарватыме йодыш республикысе правительстве гоч варажым Волжский район администраций вуйлатыше деке миен шуын. Тыге шуко еҥлан палыме, Юлсер кундем нерген утларак палдараш полшышо памятникым республикын лӱмгечыже вашеш уэмденыт.
— Олмыкташ полшаш районысо «Управдом» ООО-н вуйлатышыже Э.Зайковым йодынна. Тудын пашаеҥже-влак шордылан памятникым тӧрлен-шымартеныт, тиде кечылаште ошемденыт. Тыге шордо «кокымшо илышым налын» манын кертына, — каласышт Юлсер кундемысе администрацийыште.
Мыланнаже тыгай памятник улмылан куанаш да кугешнаш гына кодеш.
Э.Иманаев.
Фотом Волжский район администраций гыч налме.
