Ондалалтше-влаклан полша

5 октябрь – Уголовный розыск пашаеҥ-влакын кечышт

Йошкар-Оласе УМВД-н уголовный розыск пӧлкаштыже тыршыше-влак кокла гыч иктыже – полиций лейтенант Владимир Иванов.

Владимир Морко посёлкышто шочын-кушкын. 8-ше классым тунем пытарымеке, Йошкар-Оласе политехнический лицей-интернатыш тунемаш пурен. Кӱшыл шинчымашым ПГТУ-што «Сервис и туризм» направлений дене налын.

Тунемме годым 2013 ийыште Турцийыште Анталия олаште вич тылзаш практикым эртенам. Аэропортышто Россий гыч толшо уна-влакым вашлийын-ужатыме. Паша оҥай лийын. Арняште куд кече 12 шагат дене пашам ыштыме. Паша вер марте мемнам автобус дене шупшыктеныт, тӱшкагудышто оксам тӱлыде илаш верым пуэныт. Тӱҥ шотышто англичан йылме дене кутыренна, но южгунам кид дене умылтараш логалын.

Тушто пашам ышташ кодаш шонымаш лийын огыл?

Паша оҥай ыле, но кодмо шуын огыл. Ме вес эл гыч улына , сандене тушто мемнам вестӱрлын онченыт,каласыш Володя.

2015 ийыште, ПГТУ-м тунем пытарымеке, рвезым вигак армийыш наҥгаеныт. Тудо йолташыже-влак дене выпускной касыштат лийын шуктен огыл. 29 июньышто Ивановым Елань оласе частьыш колтеныт. Тушто тудо БМП-1-ын (боевой пехотный машинан) командирже лийын. Вич тылзе гыч распределений почеш Хабаровск край Бикин оласе войсковый частьыш колтеныт. Туштат БМП-1-ын командирже лийын.

Армий гыч пӧртылмеке, налме профессий дене икмыняр жап унагудышто пашам ыштенам. Чонлан келшен огыл, сандене, кӱлеш документ-влакым поген, медкомиссийым эртен, 2017 ий 8 сентябрьште МВД-шке стажировкыш толынам. Пел ийыште трӱлӧ2 материалым тергыме. 2018 ий 8 мартыште стажировко деч вара младший лейтенант лийым, а тений 8 мартыште лейтенант званийым пуэныт.

Паша шкешотан, сай ден уда могыржат шуко. Тӱҥжӧ – пашам ышташ кумылжо лийшаш. Мыйын тидыже ситышын. Нелылык але йодыш лектеш гын, полыш кидым шуйышо-влакат улыт: уголовный розыск пӧлкам вуйлатыше Михаил Горбунов, пӧлка вуйлатышын алмаштышыже Сергей Климентьев да отделенийым вуйлатыше Александр Батухтин. Нине еҥ-влак ятыр ий пашам ыштат, сандене ой-каҥаш дене эре полшат, – каласыш Владимир.

В.Иванов Интернет йӧн дене шолыштмаш да мошенничество дене кылдалтше делам наҥгая. Чаманен каласыман, тидыже пытартыш жапыште шукемын толеш. Чыла вере тидын шотышто палдараш тыршат гынат, ситуаций огеш саем. Кажне кечын гаяк республикыштына лучко наре еҥ ондалалтеш. Мутлан, Интернет сайтлаште шулдырак ак дене сатум налаш манын, оксам колтат. Сату огеш тол але йӧршын шулдо акаш толеш. Южгунам шергакан телефон олмеш шулдо телефоным пыштен колтат. Нелырак сатум налаш йодын колтат гын, олмешыже пареҥгым пыштат. Тыгай ондалчык деч вара еҥ-влак полицийыш йодмашым возат. Тыгак банк карте гыч оксам чӱчкыдын шолыштыт. Марий Элыште эн шуко, 493 000 теҥге оксам, шолыштыныт. Тыгай пашам умбакыже лейтенант Иванов гай пашаеҥ-влак тергат. Икте куандара: шолыштшо але вор-влакым муыт. Но тидлан тӱрлӧ олаш командировко дене миен кошташышт логалеш. Молан манаш гыч мошенник-влак тӱрлӧ ола гыч улыт.

Мошенник-влак дене ыштыме паша деч посна ме тылзыште ик сутка дежуритлена. Дежурство ола мучко лийын кертеш. Мутлан, телефон йоммо нерген йодмашым возат. Южгунам айдемым пуштмо верышкат лекташ логалеш. Вара нине дела-влакым чот шымлыман.

Преступленийым ыштыме верлаш лектыда. Икымше гана тыгай сӱретым ужмо годым чонлан кузе чучын?

Икымше гана мый колышо пӧръеҥын пачерышкыже миенам. Аракам йӱмылан кӧра тудын вергыже да мокшыжо чот эмганеныт ыле. Тудо пачерешыжак колен. Пӧръеҥым икмыняр кече гыч веле муыныт. Могай шижмаш лийме нерген каласен мошташ неле.

Яра жап годым мом ыштет?

Армий деч вара Стивен Кингын возымыжым лудаш келшен. Кызыт тудын возымо произведенийже почеш кином ончыктат. Спорт дене пеҥгыде кылым кученам. Кызыт яра жап лекме годым каналтыме, пелашем дене лийме шуэш. Отпуск жапыште гына книгам лудын кертам.

Вес профессийым налаш шонымаш лийын мо?

Армий деч вара Питерыш илаш куснаш, налме профессий дене пашаш пураш шонымаш лийын, но Марий Элыште илаш кодмемлан нимынярат ом ӧкынӧ. Командировкышто лиймем деч вара умылем: тыште, изи олаште, сайрак. Кугу олалаште илышыжат вес семын «шолеш». Маныт вет: « Шочмо мланде деч шерге нимоат уке» ойлымо мыланем лач келшен толеш. Вес ийын юридический кӱшыл образованийым налаш шонем.

Пайрем вашеш коллегыда-влаклан мом тыланеда ыле?

Чылаштлан чытышым, умылымашым, тазалыкым тыланем. Тыгак пелаш-влак умылен моштышо лийышт, мемнан пашаште куштылго огыл. Пашаштат чыла сай гына лийже!

Меат уголовный розыск пашаеҥ-влакым пайремышт дене саламлена!