Ончыкылык командир

Военный вургемым чийыше, гармоньым шоктен, мурла мурышо рвезым ятыр гана Интернетыште ужынам. Тунам йодыш лектын: кушеч тиде рвезе, кӧ тыгай?

Алексей Пуртов Советский район Кужмарий селаште шочын-кушкын. Тысе школышто кандаш классым тунем лекмеке, Ургаш посёлкысо лицей-интернатыш физико-математический направлений дене кадет классыш тунемаш пурен. «Кушмо семын кӧ лийме йодыш тургыжландарен. Эллан да калыклан полшымо дене кылдалтше профессийым ойырен налаш шоненам», – каласыш Алексей.

Школышто рвезе математикым, физикым, обществознанийым, технологийым да физкультурым йӧратен. Нине предмет-влак дене тӱрлӧ олимпиадылаште да конкурслаште шке ушакылжым терген. Спорт денат заниматлен, полиатлон дене спорт мастерыш кандидат лийын. Школым шӧртньӧ медаль дене тунем пытарымеке, Санкт-Петербург оласе ик военный училищыш «Артиллерия ВДВ» специальность дене тунемаш пурен. Кызыт нылымше курсышто шинчымашым пога.

«Тушманын тылышкыже логалаш да тудын вийжым артиллерийский орудий-влак полшымо дене пытараш – тӱҥ пашана. Тидлан мемнам офицер ден преподаватель-влак туныктат.

Тунемаш неле огыл, но дисциплиным шуктен шогыман, режимынат шке ойыртемже уло. Тидлан тунем шуаш жап кӱлын.

Нелат, йокрокат южгунам лиеда, но кажне гана шочмо элем, калыкем, ешем, родем, пошкудем, поро йолташем-влак нерген шонымаш тиде кумылым сеҥаш полша», – ойлыш А.Пуртов.

2017 ий годсек – Санкт-Петербург оласе да Ленинград областьысе марий-влакын «Ший корно» ушемыштын еҥже. Тыгак тудо «Югорно» ансамбльыш коштеш. «Тора кундемыште илымем годым шочмо кундем дене лишыл лияш марий тӱвырана полша. Ты ушемыш мыйым шке кундем ӱдыр Надежда Рыбакова (Демьянова) ушнаш таратен», – каласыш Алексей.

Ольош «Югорно» ансамбльыште мура да тыгак гармонь дене устан шокта. Интернетысе соцсетьлаште тудым видеошто чӱчкыдын ужаш лиеш. Ачажын гармонь да баян дене шоктымыжым ончен, рвезат кумылаҥын.

Службо деч вара яра жапыште ты семӱзгарлан жапым ойырен. Рушарня еда гармонь дене шоктен, эркын тунем шуын. Кызыт йолташыже-влак дене погынымо годым Алёша сылне марий сем почеш ӱдыр-рвезе-влакым куштыкта. «Иктаж гана кокымшо гармоньчо семын сӱаныште шокташ шонымашем уло», – палдарыш тудо.

Тунем лекмекыже, Алексей Пуртов юж-десант частьысе артиллерийский подразделенийын командирже лийшаш. «Умбакыже командир «тошкалтыш» дене кӱзаш шонем. Российын кеч-могай кундемышкыже колтен кертыт: Подмосковье гыч тӱҥалын Дальний Восток марте. Икманаш, кушко Родина ӱжеш – тушко», – палдарыш ончыкылык командир.

Рвезын альбомжо гыч налме фото.