Ныл ияшак – сценыште

Эртыше шошым, апрельыште, «Театральное Приволжье» фестиваль жапыште Йошкар-Олаште «Театральная юность Марий Эл» республикысе фестиваль конкурс эртаралтын. Тушто республикысе ола ден районла гыч 14 йоча театр студий шке мастарлыкшым ончыктен.

Фестивальын гран-приже дене Козьмодемьянск оласе А.Эшпай лӱмеш йоча сымыктыш школ пеленысе «СемьЯ+» театр студий палемдалтын (вуйлатыше И.Н. Глушкова). Ӱдыр-рвезе-влак Людмила Духанинан «Неужели меня нет» пьесыже почеш спектакльым ончыктеныт. Ынде сеҥыше-влак Юл кундем федеральный округышто эртаралтше молодёжный да йоча коллектив-влаклан фестивальыште республикынан чапшым аралаш тӱҥалыт. Тудо ноябрьыште Нижний Новгород олаште лиеш.

«СемьЯ+» театр студийыште мастарлыкшым нӧлтышӧ ик тунемше – Анна Махова. Тудо Козьмодемянскысе 3-шо №-ан школышто 9-ше классыште тунемеш. Усталык корныж нерген ӱдыр тыгерак каласкалыш:

Изинек тӱрлӧ конкурслаште участвоватленам. Книгам лудаш ондакак тунемынам, почеламутым лудаш йӧратенам. Йочасадыш коштмем годым кужу почеламут-влакым калык ончылно куанен каласкалем ыле. Садланак мыйым, изимак, Андрей Эшпай лӱмеш йоча сымыктыш школыш раннеэстетический отделенийыш тунемаш налыныт. Варажым эстетический отделенийыште мастарлыкым погенам. Тыште ме чын да чаткан мутланаш, кушташ, мураш, тӱрлӧ семӱзгар дене шокташ тунемынна.

Эстетический отелений деч вара Анна тысе школын театральный отделенийжым йошкар диплом дене тунем пытарен. Дипломым налше ӱдыр-рвезе-влак умбакыжат йӧратыме пашаштым шуяш кумылан лийыныт. Ты шонымаш нуным ик ешыш погынаш, «СемьЯ+» студийып почаш таратен.

– Театр студийлан 2 ий веле гынат, ме ятыр вере мастарлыкнам ончыктенна. Чебоксарыште, Йошкар-Олаште, Нижний Новгородышто, Казаньыште, Санкт-Петербургышто да Москваште лийынна, – каласкалыш Анна.

Йошкар-Оласе конкурсышто ончыктымо «Неужели меня нет» спектакльыште Анна Махова 27-30 ияш ӱдырамаш рольым модын, ончышо-влакым ӧрыктарен. «Ты образым чоҥаш неле ыле мо?» йодыышемлан ӱдыр тыге мане:

Куштылго огыл. Мылам содыки 15 ий гына. Спектаклысе героине ӱдырамаш тамакым шупшеш, аракам йӱэш… А мыйын лишыл еҥем-влак коклаште тыгай койышан-шамыч уке улыт. Режиссёр Ирина Николаевна Глушкова мылам «Пацанки» телешоум ончаш темлен. Тиде мылам сай полыш лийын. Но нелылык эшеат тыршаш кумылаҥда. Мый сценым моткоч йӧратем, садлан кажне рольым куанен модам. Ты ганат спектакльым аклыше-влак деч шуко сайым колаш логалын. Ончышо-влакын кумылыштым савырен кертынна гын, тиде – моткоч кугу куан.

Анна Махова сымыктыш школышто веле огыл, кыдалаш школыштыжат сайын тунемеш, тӱрлӧ мероприятийым эртарымашке ушна. Ӱдыр спортым йӧрата, бассейныш коштеш. Ончыкылык шонымашыже – экзаменым сайын кучаш.

Мемнан лудшына-влаклан тудо тыгайрак тыланымашым пуыш:

Спорт дене кылым кучыза. Тазалык мыланна илыш вийым пуа. Садлан тудлан эҥгекым ида ыштыл. Тӱрлӧ вере шке мастарлыкдам тергаш ида ӧр, чолга лийза. Айдеме шкенжым чыла могырым шуарышаш. А эн тӱҥжӧ – уда койыш-шоктышан ида лий.