Ну, модна!

Руш Кумарий

15 ноябрьыште «Кугарня» газет редакцийын пашаеҥже-влак Медведево район Руш Кукмарий школышко миен коштна.

Тунемше-влаклан «Кугарня» да «Звонок» (йоча-влаклан рушла савыкталтеш) газет-влак нерген каласкалышна. Куандара: тунемше-влак республикыштына марий йылме дене лектын шогышо газет-влак нерген палат, южыжын ача-авашт налынат пуат. Изирак йоча-шамыч дене пырля тошто марий модыш-влак дене модна. А кугурак класслаште тунемше да туныктышо-влак дене волейболла модын таҥасышна. Школын командыже мемнам 2:1 счёт дене сеҥыш. Весганалан чотрак ямдылалтына. Да товатат сеҥена! И.С.Палантай лӱмеш тӱвыра да сымыктыш колледжын студентше-влак семӱзгар дене шоктышт.

Вашлиймаш пайдале лийын манын ӱшанена.