ойла Йошкар-Оласе Г.Константинов лÿмеш руш академический драмтеатрын артисткыже Т. Милютина.
Татьяна ты театрыште 2015 ий годсек пашам ышта. Модмо рольжо-влак утыжым кугу огытыл гынат, кажне образым тудо моткоч ойыртемалтшын, мастарын чоҥа. Тиде чолга актрисе дене палыме лияш кумыл лекте. Таня дене илышыже да пашаж нерген мутланышна.
Т.Милютина Советский район Опанассола ялеш шочын. 8 класс марте Вечын школышто тунемын. Вара Советский посёлкысо 1-ше №-ан гимназийыш вончен, тысе кадетский классыште шинчымашым поген. Тÿрлö олимпиадылаште шке вийжым терген, школым ший медаль дене тунем пытарен.
– Таня, военный лияш ямдылалтше ÿдырым творческий корныш шогалаш мо таратен?
– Такшым мылам изи годсек чылажат оҥайын чучын: театральный, куштымо, мурымо, вольный кучедалмаш кружоклаш коштынам. Чыла вере чолгалыкым ончыкташ тыршенам. Кадет школ пеҥгыде, нелылыкым чытен моштышо, шкалан ÿшаныше лияш туныктен. Но тунем пытарыме жаплан усталык шÿлыш чоныштем виянрак лийын улмаш.
11 класс деч вара шкетын Москошко лектын каенам, тусо театральный вузлашке тунемаш пураш тыршенам. Но тудо жаплан кумылем пеш виян лийын, а моштымемже – нимогай. Москош коштмем вес студент-влак дене палыме лияш, шкемым тергаш веле йöрен.
– Но илен-толын, садак артист лийынат…
– Чынак. Но вик огыл. Школ деч вара Марий кугыжаныш университетысе тÿвыра да сымыктыш факультетыш (кызыт – Калыкле тÿвыра да тÿвыра кокласе коммуникаций институт) тунемаш пуренам. Культуролог да МХК дене туныктышо специальностьым налынам.
Кумшо курсышто улмем годым шкенан республикысе Палантай лÿмеш тÿвыра да сымыктыш колледжыште актер курсыш погат манын пален нальым. Тушко очно тунемаш пуренам.
– Тугеже кок вере тунемаш логалын?
– Тунемаш пурымем годым кузе ончыкыжым кок вере кошташ тÿҥалме нерген шонашат тоштын омыл, но кумыл уло гын, чыла ышташ лиеш. Куржталаш логалын, мутат уке. Мый пеш эр кынелам да моткоч вараш малаш возам ыле. Южгунам «Молан мылам тиде кÿлеш!» манме шонымаш-влак ушыш толын пуреныт, но лектышым шижмеке, куштылгырак. Тунемме деч посна мый кажне ийын, кеҥеж сессийым ончылгоч петырен, йоча лагерьыште вожатый сомылым шуктенам. Мыйын шонымаште, нелылык мемнам виянрак лияш, чотрак тыршаш тарата. А тыршыме годым лектышат лиеш.
Мый паленам: актрисе лиям, театрыште пашам ышташ тÿҥалам. Тиде шонымаш мыйым эре кумылаҥден. А университетыште тÿнямбал художественный культурым тунеммем, тÿрлö эпохо-влак да искусство теорийым палымем кызыт пашаштем кÿлеш. Поснак историй дене кылдалтше рольым модмо годым…
– Эн келшыше ролет-влак улыт? Могай рольым моднет ыле?
– Ролем-влак шуко улыт манаш ок лий. Но мый кажне изи рольым йöратен модам. Мылам шкемым у вел гыч «почаш», у образыште тергаш келша. Образым сайынрак, чынрак чоҥаш манын, книгам лудам, ятыр шымлем. Теве «Марш Акпарса» спектакльыште Иван Грозныйын пелашыжым, Анастасиям, модынам ыле. Тиде историй гыч налме образ, садлан мый Анастасия царевнан уло илыш корныжым шымленам, тудын койыш-шоктышыжым палаш тыршенам.
Могай рольым модшаш шотышто… Кеч поро, кеч осал койышан герой-влак лийышт – мый кажныжым куанен модам ыле. Мыняр роль неле, тунар чот тудо йöратыме лиеш. Молан манаш гын, тыршет, пашам ыштет, сай кÿкшытыш шуаш кумылаҥат. Тидыже кеч-могай артистлан келша, шонем.
– Таня, ала ешет нерген палдарет ыле?
– Пелашем уло. Ме коктынат руш драмтеатрыште пашам ыштена. Артист Евгений Сорокин ынде лу ий утла ты театрыште тырша. Мемнан идалыкаш икшывына уло.
– Тау тылат, Таня. У роль-влакым, творческий шÿлышым тыланен кодына.