Кодшо кугарнян «Кугарня» газет редакций «Воштылаш, товатат, сулык огыл!» мыскара фестиваль-конкурсын отборочный туржым Марий Турек районысо «Заря» тӱвыра да каныме полатыште эртарыш. Тышке Шернур, Марий Турек, Параньга, Морко районласе мыскараче-влакым ӱжынна ыле. Чаманен каласыман, шукышт тӱрлӧ амаллан кӧра ышт тол.
Залыште мыскарам ончышо да умылышо еҥ-влаклан Параньга район Олор гыч мийыше Людмила Очеева гай мыскараче ыш сите. Калык ончыко Людмила шке мыскараж дене кум гана лекте. Тудын «Хобби» номержым жюри 1 апрельыште Йошкар-Олаште эртышаш фестиваль-конкурсыш ойырен нале.
Ончыч Олор йочасадыште пашам ыштыше воспитательнице Л.И.Очеева хоббим кычалын коштмыж нерген оҥайын каласкален, таза илыш-йӱлам шукташ ӱжын. Тыгак сценышке негр лийынат лекте, «Пӧлек» монолог денат калыкым воштылтарыш. Сценыште шогылт моштышо марий ӱдырамаш шкеж нергенат оҥайын каласкалыш:
«Мый Таня йолташ ӱдырем дене пырля Олорышко изак-шоляк-влаклан марлан толынна. Мыйже У Торъял район Кузнеч ялеш шочын-кушкынам, Татьяна Советский район Роҥго вел гыч. Пырля воспитательлан пашам ыштышна, сулен налме канышыш лектынна. Выступатлашат туддене пырляк тӱҥалынна».
Очеевмыт кермыч пӧртым чоҥеныт. Трактористлан пашам ыштыше Сергей Петрович пелашыж дене ӱдыр ден эргым ончен куштеныт. Кум уныкашт уло. Пайрем годым кочкын-йӱын гына огыт шинче, Людмила эре мыскарам ыштылеш, модышым эртара. Тудо тӱрлӧ рольым модеш, Мераҥат, Колят, Маскат лияш келша. Весела шӱм-чонан ӱдырамаш йоча койышымат койын мошта. Мыскарам шкежак шонен муэш да кагазыш возкала, вара нуным тӧрлатылеш – тыге ойлымаш шочешат. Олор тӱвыра пӧртын ансамбльже дене пырля тӱрлӧ вере выступатла.
Марий Купто тӱвыра пӧрт пеленысе «Ӱжара» ансамбльлан улыжат кок ият пеле веле. Тыгай лӱман ансамбль ожнат лийын. Но тудым тӱвыра пӧрт вуйлатыше Галина Сергеевна Тихоновалан угыч чумыраш логалын. Таче тушко самырык да кугурак ийготан еҥ-влак коштыт.
Концертышкына ансамбль икмыняр номерым ямдылен конден. Мыскара сынан мурымаш-куштымашышт ситышын, лач пӱсӧ мыскара сценкышт але монологышт уке. Марий вате-влакын кызытсе илышлан келыштарыме куштымашышт дене Сеҥымашын ХХХ идалыкше лӱмеш тӱвыра полатыште эртышаш фестиваль-конкурсым сӧрастараш ӱжна.
Тыгак сценыште Параньга район Памашъял гыч Артур ден Максим Вараксинмыт гармонь почеш муралтышт. Ший Алиса (Халтурина) йытыра мурыжо-влак дене куандарыш. Концертым «Кугарня» газетын журналистше Татьяна Пчёлкина устан вӱден, ятыр мыскарам ойлен, ончаш толшо калыклан сценыш лекше-влак дене палдарен. А пытартышлан Татьяна Александровна участник-влакым сӱан семым шокташ йодын да Ший Алисам Максим Вараксинлан марлан пуэн. Ты йӱлам ончыктымашке «Ӱжара» ансамблят ушнен.
И.Речкинын фотожо-влак.