– Эртыше 2019 ий мыланем куанымат, ойгымат конден. Ий тӱҥалтышыштак мыйын йӧратыме ачам илыш гыч кайыш. Ынде ача-авамым порын шарнен илаш гына кодеш. Но илыш умбакыже кая. Куаным ойго годымат шижын да аклен моштыман улмаш. Тений ешем дене Эстон мландыште уна лийна. Тушто илыше поро йолташна-влак мыланна Тошто Таллинын моторлыкшым ончыктен коштыктышт, моло олашкат намийышт. Пеш келшен. Куанем, пашаштемат ятыр оҥай вашлиймаш, конкурс-влак эртаралтыныт. Уста еҥ-влак дене вашлийме пагыт эреак сай шарнымашым кода. А эше куанем, кунам чонем поэзий толкын авалта. Теният у почеламут-влак шочыч. Тек У ий кажне айдемылан пиалым конда. Таза кап-кылан, таза чонан лияш кажнылан тыланем!