Кеч-могай мужырлан пырля пашам ворандараш куштылгырак. Теве Пошкырт кундем Балтач район Мишкан ялыште Захаровмыт нерген мужыр оҥгыр улыт манаш шотлан толеш.
Нунын ешыште куд икшыве шочын. Кызыт кугурак ийготан йоча-влак шке илыш корныштым ойырен налыныт, иктаж вере профессийым налыт але пашам ыштат.
Снимкыште: аваже шола велне.
Ачашт ден авашт нуным пашам йӧратен кушкаш, чолга да поро лияш туныктеныт. Алия Салимяновна ятыр ий тӱҥалтыш класслам туныктымо деч вара кодшо ийын сулен налме канышыш лектын. Но кожмак койышыжо суртсомылка дене гына шогылташ огеш пу. Тений март гыч ты ӱдырамаш Мишкан тӱвыра пӧртым вуйлата.
Данил Михайлович профессийже дене шофёр-тракторист, тидлан СПТУ-што тунемын да верысе озанлыкыште трактористлан пашам ыштен. Пограничник. Воин семын Шочмо эл ончылно порысшым Афганистаныште шуктен. 1987 ий годсек пӧрт воктенысе мӱкш отарыште тырша. Такшым мӱкшым ты тукымышто Сакар коча ончаш тӱҥалын. Тылеч посна суртоза шуко вольыкым ашна.
Вате-марий Захаровмыт тӱвыра пӧртысӧ «Ар Мишкан» ансамбльышке коштыт, тӱрлӧ верлашке концерт дене миеныт. (Снимкыште — «Ар Мишкан» ансамбль).
Кугурак эрге
Захаровмытын Дмитрий эргыштым Йошкар-Олаште илыше мер пашаеҥ-влак шукертсек палат. Тудо Екатеринбургышто ила да тусо марий-влак дене пырля тӱрлӧ мероприятийлаште участвоватла. Дмитрий Екатеринбург олам тӱзатыме шотышто пӧлкаште специалистлан пашам ышта гынат, шӱм-чонжо дене марий тӱвыралан кумылан, ятыр ий «Яндар памаш» ансамбльыш коштеш. Тылеч посна тудо марий калыкын юмынйӱлаж шотыштат шке шонымашыжым Марий калык погыныштат луктын каласен ыле.
Кугурак ӱдыр
Ешыште эн кугурак шочшо – Лидия. Тудо кодшо ийын кеҥежым Марий самырык тукым слётышто лийын. «Тылеч ончыч Дима шольым, Анастасия, Мария шӱжарем-влак слётышто участвоватленыт да тушеч моткоч кумыл нӧлтшӧ пӧртылыныт. Сандене мыят моло марий ӱдыр-рвезе-влак дене пырля лияш шонен иленам. Пытартыш жапыште марий тӱвыра, йӱла да историй нерген шукырак пален налаш тыршем. Тыгак ожнысо марий тувырым чияш утларак келшаш тӱҥалын, сандене туддене ятыр фотографийым ыштенам», – каласкалыш Лидия.
Пошкырт кундемыште ош тувырыш гладь дене пеледышым тӱрлен чийымаш модышко пурен. Л.Захароват ял пайрем вашеш кум тыгай тувырым урген-тӱрлен. А вара слётышто ожнысо марий тӱр дене палыме лийын, ынде тыгай тӱрым куэмыш пышташ тунемнеже.
Лидия Мишкан школышто 9-ше класс деч вара Уфашке технологий ден диззайн колледжыш ургызылан тунемаш каен. Вара коважын темлымыж почеш кӱшыл шинчымашым налаш Екатеринбургысо ик вузым ойырен налын. 2016 ийыште гуманитарный университетым «Управление персоналом» специальность дене тунем пытарен.
Марий ӱдыр Екатеринбург олаштак ила да итальян вургемым ужалымаште старший продавецлан пашам ышта. Но 30 март гыч 19 май марте тудлан самоизоляцийыште лияш пернен. Сандене шочмо Мишкан ялышкыже кудалын. Ача-аважлан сурт пашам шукташ полша. Тылеч посна ты жапыште Лидия курчаклан марий тувырым урген, шӱшерым шке ыштен.
Туныктышо корныш
Анастасия Пӱрӧ педагогический университетым тунем пытарен. Мишкан район У Накаряк школышто англичан ден француз йылмылам туныктыш. Кызыт Захар эргыж дене мӧҥгыштӧ шогылтеш. Жапше лийме годым сӧрастарыме настам марий орнамент дене келыштара.
Ты чолга ӱдыр тунеммыж годым Work&Travel программе дене Америкыш миен коштын. Тушто йылмым палыме шот дене ныл тылзе лийын. Тидыже тудлан чот полшен, англичанла сайын кутыра. Ик кеҥежым Настя ден Лидия Турцийыш канаш миен коштыныт. Тушто да моло вереат англичанла сайын кутырен моштымыжым пеҥгыдемден.
Мария туныктышо корным ойырен налын. Тудо Екатеринбургысо торгово-экономический техникумым тунем пытарен да туштак пашам ышта, «Технология общественного питания», «Микробиология» предмет-влакым туныкта. Тыгак кызыт шке специальностшо дене Уральский государственный экономический университетыште заочно шинчымашым пога.
Дарья тыгак педагог лияш шона. Тений тудо Мишкан район Чорай гимназийым тений тунем пытара. А эн изирак Кирилл вашке 8-ше классышке вонча. Каласыман: Кирилл – ача-аван эҥертышыже да ӱшанже. Тудо мӱкшым ончаш кумылаҥын, моло пашаланат кугун полша.
Захаровмыт ешым районышто сайын палат. Нуно ешге тӱрлӧ мероприятийыште чолган участвоватлат.
Пётр Абдулов, Пошкырт кундем Балтач районысо марий-влакын «Эрвел марий» национально-автономный рӱдерым вуйлатыше:
– Алия Салимяновна ден Данил Михайлович Захаровмыт коктынат мер организацийнан правленийжын членже улыт, мер пашашке кумылын ушнат. Алия Салимяновнан вуйлатыме «Ар Мишкан» ансамбль – районысо да республикысе мепоприятий-влакын дипломантше. Кажне ийын Балтач районышто Сылнымут пайремым эртарена. Захаровмыт тыште эре мастарлыкыштым ончыктеныт. Тылеч посна ты еш шуко мероприятийым эртараш спонсор лийын. Пашаче, келшен илыше еш нерген шуко поро шомакым гына ойлаш лиеш. Мишкан ялын лӱмгечыжым пеш ямлын эртарышт. Ты пайрем вашеш Захаровмытлан кӧра ялын гимнже шочын.
Эльвира Терентьева.