Муро тӱняште ила

Светлана Яндукова, Олык Ипай лӱмеш премийын лауреатше, «Марий Эл» кугыжаныш мурышо да куштышо ансамбльын солисткыже: «Марий Эллан 100 ий теммылан пӧлеклатше идалыкын кажне кечыже пайремла чучеш. Тиде кугу событийым чонна дене гына огыл, пашам куанен да кыртмен ыштымына дене вашлияш ямдылалтына. Ансамбльын солисткыже семын тӱрлӧ кундемлаште, вес еҥ-влакын илыме вершӧрлаште лийынам, но шӱм шочмо марий мландышкак ӱжеш да тудым гына йӧрата. 29 февральыште Нижний Новгород олашке Ӱярня пайремым эртарымашке миенна. Тушто шке возымо «Марий Элем» мурым мурымеке, ончаш толшо-влак «Браво! Браво!» манын кычкырал колтышт. Тыге мыйын Марий Элым йӧратымемым вес еҥ-влакат шижыныт, шонем. Шуко почеламутлан семым возенам, шкеат мурем, моло артист-влакат мурат. Патриот шӱлыш, шочмо мландым моктымо шижмаш вий-куатым ешарат».
Светлана Альбертовнан кугу произведенийже-влаклан «Юмын ӱдыр» мюзиклым, «Марипарк» (музыкым «Марий Эл» ансамбль оркестрын баянистше-влак дене пырля возеныт) постановкым, «Юкече» йоча ансамбльлан келыштарыме композицийым да молымат шотлаш лиеш.
Шукерте огыл Светлана Яндуковам Марий Эл правительствын Почётан грамотыж дене наградитленыт. Тиде аклымашым Светлана Альбертовна шукертак сулен, тачысе пагытлан Марий Элын сулло артисткыже лӱмым нумалаш жап. Вет паша саскаже моткоч лӧза да сай лектышан. Кызыт Аркадий Курочкинын «Марий Эл» почеламутшылан семым келыштарен да тудым «Марий кундем» оркестр почеш мурызо-влак Александр Егошин, Нина Казашова, Вера Соболева да Светлана Яндукова мурат.
2021 ийыште ожнысо пагыт гыч тӱҥалын тачысе илыш марте марий патыр-влакын эртыме корныштым почын пуышо у проект лекшаш, тудым музыкант «Марий Эл» ансамбльын репертуаржылан ямдыла.
Светлана Яндукова йочаж годым президент школ-интернатыште тунемын. Пеш чулым, писе ӱдыр лийын, семӱзгар дене шоктен, йоча хорышто мурен. Теве 2 февральыште Марий калыкын йоча хоржо выступатлыме деч ончыч уста еҥ-влаклан наградым кучыктымо годым Светан аваже шортын колтыш. Зоя Васильевна Соколова нине йоча-влак коклаште ала-кунам тыгак мурен шогышо ӱдыржым ужын.
Жап пеш писын эрта. Таче Светлана Яндукова – шкежат кум йочан ава да ик уныкан кова. Яндар йӱкшӧ дене муралтен колта гын, тӱня помыжалтеш, шонет. «Мый изием годым марла пеш кутырен моштен омыл, садлан Юмым сӧрваленам. «Мутланашем каньыле лийже, йылмем лывырге лийже» манынам. Шочмо марий йылме дене кызыт чыла шонымем ойлен кертам, лудын-возен моштем, эреак тунемам, лудам, садлан мылам тиде кугу пиал!», – манеш мурызо Светлана Яндукова.