Параньга район Усола ялыште шочын-кушшо Алексей Тихонов дене шукерте огыл эртаралтше «Какшан сер ӱмбалне» авторский муро фестивальыште палыме лийна. Тыште рвезе гитарым шоктен, шке возымо мурыжым муралтыш. Ончышо-влакын да жюрин кумылыштым савырен, сеҥыше-влак радамыш логале. Рвезе тиде семӱзгарлан кузе шӱмаҥмыж нерген каласкалыш.
– Йочасадыште, школышто мураш-кушташ эре кумылаҥденыт. Тыгак тӱрлӧ турслётыш, походыш коштынам. Тунамак гитарым шокташ кумылем лийын. Шонымашем 4 ий ончыч, студент пагытыште, шукталтын. Ме йолташ рвезе дене икте-весыланна мутым пуэнна: гитарым шокташ тунемаш. Ик тылзе жапыште шоктен мураш тунемым. А вара сем-влак шочаш тӱҥальыч, мутат возалте. Гитар тунам шкемын лийын огыл, садлан икымше стипендий дене шканем тиде семӱзгарым нальым, – мане Алексей.
Алексей Тихонов 9-ше класс марте Усола школышто тунемын. Вара Параньга посёлкысо кыдалаш школым ший медаль дене тунем пытарен да Марий кугыжаныш университетыш математик-программистлан тунемаш пурен. «Молан программист?» йодышлан Лёша тыге вашештыш:
– Мемнан школ социально-экономический направлениян ыле гынат, мый математикым чотрак йӧратенам. Программирований, сайтым ыштыме паша эре оҥайын чучын. Экзаменым сайын кученам, садлан вузыш пураш, келшыше специальность дене кӱшыл шинчымашым налаш нимо мешаен огыл. Кызыт Поволжский кугыжаныш технологический университетыште «программный системе» направлений дене тунемам, магистр лияш ямдылалтам.
Магистратурышто тунеммыж годым икымше семестр деч вара экзаменым сайын кучымеке, туныктышыжо Алексейлан пашам темлен. Кызыт рвезе гостиничный бизнес дене кылдалтше пашам шуктышо организацийыште программистлан пашам ышта, сайтым вӱдымӧ сомылым шукта.
– Пашам ышташ да тунемаш куштылгыжак огыл. Тений диссертацийым аралыман. Но мый шукташ тыршем. Паша деч вара тӱшкагудыш толам да жап лийме семын йӧратыме семӱзгарем кучен шинчам. Пытартыш ик ий жапыште у мурем-влакым видеош войзен, интернетыш лукташ тӱҥалынам. Шукын поро мутым ойлат, кумылым нӧлтат. Калык ончылно тений икымше гана выступатленам, – каласкалыш Алексей.
Рвезын муро тӱняшке икымше ошкылжо ӱшаным пуышо, тыматле. Ончыкылык нерген мут лекмеке, Алексей «Эше армийыш миен толман» манын шыргыжале. Творческий шӱлышан программистлан эре тыгаяк чолга, шочмо йылмым да калыкым йӧратыше кумылан лияш тыланена.