Борислав Ашиев дене Пошкырт кундемысе Нефтекамск олаште эртаралтше ик концерт годым палыме лийна. Тунам рвезе Станислав Шакировын да Элвин Грейын репертуарышт гыч муро-влакым муралтыш. Тыгай чатка, мотор йӱк шуко еҥым ӧрыктарыш. Калыкат Бориславым сцнене гыч кужу жап ыш колто, рӱж совым кырыш…
Борислав Пошкырт кундем Мишкан район Изи Накаряк ялыште шочын-кушкын. 9 класс марте ты ялысе школыш коштын, 10-11 класслам Мишкан селасе школышто тунемын.
— 10-шо класс деч вара ача ден авам мылам гитарым пӧлекленыт. Кеҥеж каныш жапыште мый тудым шокташ тунемым. Мураш изинекак йӧратенам. Ачам, Борис Паляевич, 4 ияшем годымак гармонь дене шокташ туныктен. Авам, Людмила Владимировна, марий йылме да литератур туныктен. Кызыт коктынат сурен налме канышыште улыт. Авам пеш сылнын мура. Мый тудын мурыжо денак кушкынам. Шӱжаремат мураш пеш тале, – каласкалыш Борислав.
Школ деч вара Б.Ашиев Курганысе пограничный институтыш тунемаш пурен. Тыште тунемме жапыште «Лада» мурышо ансамбльыш коштын. Ты ансамбль дене Российын тӱрлӧ верлаштыже лиеден. 2007-ше ийыште Москваште эртаралтше пограничный муро конкурсышто лауреат лӱмым налын.
Муро-влакым Борислав рушлат, марлат мура. Репертуарыштыже тӱрлӧ палыме муро-влак улыт. Нуным рвезе у семын, шке умылымашыж почеш йоҥгалтара. Южо мурылан аранжировкым Москваште лӱмын воза. «Ала шкеат мурым шочыктет?» манын йодмемлан тудо тыге мане:
— Шке возен ончен омыл. Мыйын шонымаште, возышаш улам гын, тыгай кумыл шке летеш. Тиде – шкешотан юзо йӱла. Тудым Юмо пуа. Садлан мурым виеш шочыкташ тунемаш ок лий. Мый весе-влакын возымыштым колыштам. Чыла вере: мӧнгыштӧ, машинаште, самолётышто. Телефон да наушник улмылан кӧра муро тӱня дене кылым ом йомдаре. Муро мылам илаш полша.
Кызыт РФ ФСБ-н капитанже Борислав Ашиев Чукотко кундемысе Анадырь олаште контракт почеш службым эрта, Пограничный службышто тырша, США чекыште элнам арала. Шочмо Пошкырт кундемышкыже идалыклан ик-кок гана миен толеш. Службыж нерген рвезе утым ыш каласкале. Лачак Чукотко кундемын моткоч мотор улмыжым палемдыш. Тысе пӱртӱсым мыскара семын «Вес тӱня» манын лӱмдымыж нерген ойлыш. Тора кундемыште улмыж годым рвезе чӱчкыдын марий мурым колыштеш, марла книга-влакым лудеш. Тыге шӱм-чонжо дене шочмо верышкыже толын кая.