Идалык ончыч Россий регионласе телеканал-влаклан эртаралтше конкурсышто Марий Элысе «МЭТР» телеканалат шке вийжым терген. Федеральный комиссийын иктешлымыж почеш тудо республикыштына общедоступный телеканал семын 21-ше каналыште пашам ышташ тӱҥалын.
Кызыт «МЭТР» телеканалым кеч-могай кабельный ТВ (мутлан, Дом.ru, Ростелеком) дене пайдаланыше-влак 21-ше каналыште ончен кертыт. Тудо сутка мучко кок йылме дене, марла да рушла, передаче-влакым ончыкта. Тылеч посна республикысе икмыняр кундемыште аналоговый ТВ уло. Икмыняр моло регион семынак Марий Элыште тудым чарен огытыл. Сандене пӧлемысе але уло пӧртлан келыштарыме антенне полшымо дене РенТВ телеканалыште регион-влаклан ойырымо жапыште МЭТР-ын икмыняр передачыжым ончаш лиеш.
Марий Эл телерадиокомпанийын тачысе илышыже да ончыкылыкшо нерген МЭТР-ын директоржын алмаштышыже, телерадиопрограмме-влак шотышто продюсер Екатерина Нечаева (фотошто покшелне) каласкалыш.
– Таче кече марте пеш шуко паша ышталтын. Но ыштышаш сомыл эшеат шуко. Телевиденийыште тыршыме деч посна ме МЭТР-FM радиостанцийым кучена. Мутлан, Марий Эл радио тӱрлӧ кундемыште илыше еҥ-влакын йӧратыме «йолташышкышт» савырнен. Ончыкыжым тудым районлаштат FM частоташке кусараш шонена. Вес ий радио 15 ияш лӱмгечыжым палемда. Ты пайрем республикын юбилейже дене келшен толеш. Садлан, калык дене эшеат сай кыл лийже манын, шуко у шонымашым илышыш пуртен. У программе-влакат лийшаш улыт.
Шукерте огыл ме «Новая» радиостанцийым почынна. Тудым кызытеш Йошкар-Ола кундемыште 107,2 FM частоташте колышташ лиеш. Тыште вес элласе да руш хит муро-влак йоҥгат, но ончыкыжым тудым калыклан эше оҥайракым да пайдалыракым ыштена.
МЭТР-ыште чылаже уста, творческий шӱлышан 41еҥ пашам ышта. Екатерина Юрьевна пырля пашам ыштыме йолташыже-влак нерген ятыр поро мутым ойлыш, сеҥымашышт дене палдарыш. Мутлан, шукерте огыл тысе пашаеҥ-влакын «Химия искусства» проектыштым «Герои нашего времени» Росийысе фестивальыште эн сай режиссёр паша семын палемдыме. Тыгак Марий Эл Телерадио вуйлатыше Ирина Фоминых Российысе журналист да блогер-влаклан эртарыме «МедиаТур» конкурсышто республикысе туризмым вияҥдыме шотышто передачылаж дене 1-ше верым сеҥен налын.
– Конкурслаште вийым тергыме дене ме паша мастарлыкнам пойдарена, тидыже ончышо да колыштшо еҥ-влакын кумылыштым нӧлташ полша. Ме Марий Элыште илыше калык дене сай кылым ышташ тыршена. Кажне еҥын шонымашыже шерге. Садлан иктаж темлымашда, ой-каҥашда уло гын, мыланна йыҥгыртен каласыза. Тыгак соцсетьлаште мемнан групынам муын, тушко серышым колтен кертыда. Видео йӧн дене возымо увер-влакымат колташ лиеш. Почтына – news@metr12.ru. Икманаш, мемнан дене пырля лийза, – каласыш Екатерина Юрьевна.