«Мемнан Сеҥымаш кечына» (Наш День Победы) акцийыш Киров область ушнен. Россий президентын Юл кундем федеральный округысо полномочный представительжын темлыме акций нерген Интернетыште материал-влак #песнипобедыПФО #нашденьпобеды хештег дене шыҥдаралтыт.
Видеосюжетым Киров олаште, Виче эҥер воктенысе «Курымашлык тул» мемориал ончылно, элыштына «мӧҥгыштӧ шинчыме» режимым увертарыме марте сниматлыме.
Киров кундем гыч Кугу Отечественный сарыш 600 тӱжем наре еҥ каен, 250 тӱжем утла самырык вуйыштым сӧй пасуэш пыштеныт. 200 утла салтак Совет Ушемын Геройжо лӱм дене палемдалтын.
Тулан пагыт годым ты регионыш элнан касвел ужашыж гыч шӱдӧ дене промышленный предприятийым кусарыме. Пеш кӱчык жапыште пашам тӱҥалаш логалын. Тыге Киров область гыч фронтлан шӱдӧ тӱжем дене снарядым, танкым да чапланыше «Катюшым» колтеныт. Вятскополянский машиностроительный заводын пашаеҥже-влак 2,5 миллион ППШ-ым (Шпагинын пистолет-пулемётшым) ямдыленыт. «Сеҥымаш оружийын» шонен лукшо конструктор Георгий Шпагин шкежат тыштак тыршен. Икымше пистолет-пулемётым фронтыш 1941 ий ноябрь мучаште колтеныт.
Тылыште тыршыше-влакын надырыштым шотыш налын, Киров да областьысе икмыняр ола Паша чап ола лӱм дене палемдалтын.
Эвакуироватлыме еҥ кокла гыч шукын блокадный Ленинград гыч лийыныт. Сар тӱҥалме икымше ийынак тышке 200 утла интернатым кусареныт, тушто 23 тӱжем наре йоча илен.
Киров кундемын шочшыжо Григорий Булатов Рейхстаг ӱмбалне йошкар тистым нӧлталше кокла гыч иктыже лийын, «знаменосец Победы» лӱм дене чапланен.
Ушештарена: 8 май марте Юл кундем федеральный округысо чыла регионышто «Сеҥымаш кече» муро йоҥгалтеш. А 9 майыште марафон иктешлалтеш. «Мемнан Сеҥымашна» («Наш День Победы») акцийыш ПФО-со чыла гаяк регион ушнен. Киров деч вара Оренбург областьлан марафоным иктешлаш кодеш.
Сайт ден социальный сетьлаште проект нерген #нашденьпобеды, #песнипобедыПФО хештег гоч пален налаш лиеш.