9 Май пайрем кечын Юл кундем федеральный округышто «Мемнан Сеҥымаш кечына» (Наш День Победы) муро марафон иктешлалт йоҥгалтеш. Кугу Сеҥымаш пайремым 75-ше гана пайремлыме идалыкышыте «Сеҥымаш кече» мурым 25 апрель гыч 8 май марте Юл кундемысе регионлаште илыше-влакын кугыжаныш йылымышт дене муреныт. Тÿрлö калыкым ик хорыш тыге ушен муралтыме акций икымше гана эртаралтын.
Россий президентын Юл кундем федеральный округышто полномочный представительжын темлыме акций нерген Интернетыште материал-влак #песнипобедыПФО #нашденьпобеды хештег дене шыҥдаралтыныт.
«Сеҥымаш кече» мурыланат тиде идалык — лӱмгечан, икымше гана тудо 45 ий ончыч йогалтын. Таче тудо гимн семынак йоҥгалтеш. Композитор Давид Тухмановын семжылан да Владимир Харитоновын мутшылан возымо мурышто проста шомак гоч Сеҥымаш куанымат, ойго шинчавÿдымат ончыктен моштымо, калык чоныш шыҥдарыме. Акций жапыште муро руш, мокша ден эрзя, марий, башкир, удмурт, чуваш да татар йылме дене йоҥгалтын. Тудым мемнан сайтыштат эскерен кертында, социальный сетьлаште, ютуб-каналыштына мурым йоҥгалтарымым #песнипобедыПФО #нашденьпобеды хэштег дене шыҥдаренна.
Чыла видеороликым элыштына мӧҥгыштӧ шинчыме режимым увертарыме марте возымо.
«Мемнан Сеҥымаш кечына» муро марафоныш СССР-ын калык артистше Леонид Сметанниковын ушнымыжо акцийым эшеат виянракым, кумдаракым ышташ полшен. 1975 ийыште совет телевиденийыште тунам эше нигöлан палыме мурым лач тудо икымше гана йоҥгалтарен. 2020 ийыште лÿмлö мурызын йÿкшым уэш колышт кертынна.
«Сеҥымаш кече» мурым марла Я.Эшпай лӱмеш Марий кугыжаныш филармонийын артистше-влак «Марий кундем» калык семӱзгар оркестрын шоктымыж почеш муреныт.