Самырык-влак, ешым погымек, шке «лукыштышт» илаш шонат. Но шке вий дене иканаште пачерым налаш але у пӧртым чоҥаш моткоч неле. Ача-ава полыш деч посна шукыж годым нигузе ончыко каен от керт. Адакшым самырык-влак чылан официально пашам огыт ыште, садлан нунылан пачерым налаш але пӧртым чоҥаш банк кредитым пешыжак огеш пу. Медведево районысо Изи Шаплак ялыш пурымаште ик ешым шке участкыштыже ужна. Пӧръеҥ, электроприборым кучен, ала-могай сомылым шукташ ямдылалтеш, а пелашыже йыраҥ коклаште тошкыштеш. Теве эргыштат койылалтыш. Тиде Араповмыт еш улмаш.
Елена ден Александр Араповмыт 2017 ийыште шке шонымашышкышт шуыныт. «Йошкар-Ола деч тораште огыл, кугорно воктенак шке участкым налаш шоненна. Интернетыш пурен, «Изи Шаплакыште (Шопкирла ялыште) мландым налаш» манын возышна да иканаште «Кок участкым аукционыш лукмо» нерген увер савыкталте. Ме Медведево администрацийыш мийышна да аукционышто участвоватлаш кумылан улмынам ойлышна. Пиалешна вес налше еҥ лийын огылат, мыланна ты мланде логале. Тудым 260 тӱжем теҥгелан налынна да вигак чоҥымо пашалан пижынна», — мане Елена Арапова.
Кок ий жапыште нуно мончам, левашым чоҥеныт, тавым кӱнченыт, ынде верандым ыштен шуктынешт. Участке йыр ик велым кӱртньӧ меҥге-влакым шогалтыме. А урем могырыштыла шпагат кандыра дене «печым» ыштыме.
«Чон мланде воктене илаш ӱжеш, родына-влакын пӧртым чоҥымыштым ужынна да меат «ылыжынна». Эше самырык улына, вийвал пагыт. Молан пӧртым чоҥаш огыл? Пелашем пакчагӧргыштӧ чыла саскам шынден, а мый, паша куштылгырак лийже манын, йӧным ыштем. Теве вӱдым налаш тавына, пакчам пушкыдемдаш культиваторна улыт. Кызыт техникым налаш йӧсӧ огыл, чыла ужалат. Мемнам ончен, палымына-влак яллашке илаш куснаш шонат. Южышт пачерыштым ужален, тыгаяк участкым налын, пӧртым чоҥат. Мланде вийым пуа, тыште чонна каналта, ласкалыкыкым шижына», — ойла Александр Арапов.
Елена Йошкар_оласе ММЗ заводышто конструкторлан пашам ышта, а Александр ик фирмыште – сварщик. Когыньыштынат мастарлыкышт палдырна: сварщикын печыже, меҥгыже, таве леведышыже чаткан ыштыме, а конструкторын йыраҥже-влак чертёж гай койыт.
«Йошкар-Ола гыч кажне кечын паша деч вара тышке кудалыштына, мӧҥгеш кайымат огеш шу. Вет улыжат куд меҥге веле лиеш. Пӱртӱс моткоч мотор, воктеннак чодыра гӱжла, шож пасу… Кастене лектын шинчына да пӱртӱсым йӧратен ончен шинчена. Пасушто апшатлыве (сверчок-влак) волгалтыт. Шошым ужар пасу мардеж дене лойгалтеш, туге чучеш, пуйто теҥыз воктене шинчет, Чыла ты сӧраллык пашам ышташ кумылым луктеш», — умбакыже ойла Елена.
Коктынат Йошкар-Олаште шочын-кушкыныт, шонет да ӧрат: южо еҥ, ялым коден, олашке илаш кайынеже, а оласыже, мӧҥгешла, ял – илышын ончыкылыкшо манеш.
«Изи пӧртым огына чоҥо, вара кугу пӧртым нӧлташ стимул манмет йомеш. Южо еҥ мончам да изи пӧртым чоҥат да тиддене пашашт «пижеш». Ме тыге ондалалташ огына шоно. Вес ийын у пӧртлан негызым пыштынена», — каласыш Елена Арапова.
Ӱшанена, шонымо пашашт шукталтеш. Вет вате-марий кеч-могай сомылым ышташ тӱҥалмышт деч ончыч шонкален мутланат, планым чоҥат. Оксам банк гыч налаш огыт шоно, а погат. Тидлан ик банкын накопительный пограммыж дене пайдаланат.
Араповмыт ешын пакчаж гыч лекмет огеш шу. Пеледыш-влак сӧралын пеледыт, чайым йӱнет, мелиса кушкеш. Изи олмапу-влак вуйыштым нӧлтат. Чынак, тыште чонлан ласка да куштылго улмаш.
