Марий рвезе ротын командирже лияш ямдылалтеш

Морко район Кораксола ялыште шочын-кушшо, кызыт Бурятий Республикыште служитлыше марий рвезе Василий Гаврилов эре военный лияш шонен. Школышто тунеммыж годым спортын тӱрлӧ видше дене заниматлен, таҥасымашлаште вийжым да писылыкшым терген да ятыр гана ончыл верыште лийын. Российын историйжым кыртмен тунемын. Вес семынже лийынжат кертын огыл. Тудын аваже Светлана Васильевна Гаврилова – историйым туныктышо. Пелашыж дене коктын эргыштым изинек патриотым куштеныт.

Вася Кораксола ялыште верланыше Шӱргыял кыдалаш (кызыт тӱҥ) школышто кандашымше класс марте тунемын. Варажым Озаҥ оласе Суворовский военный училищыш каен. В.Гаврилов ойла: «Тушко тунемаш пураш манын, физически виян лийман. Турникыште икмыняр гана шкем нӧлташ, 100 метрым да кум меҥгым кӱчык жапыште куржаш кӱлын. Тидын шотышто мый нелылыкым шижын омыл. Школышто куштылго атлетике дене заниматленам, ече дене коштынам. Суворовский училищыште тунемме годымат таҥасымашлаште участвоватленам. Ялысе рвезе-влак утларак кӧргӧ виян улыт, шонем. Йоча годым мӧҥгыштӧ ача-ава пелен тӱрлӧ пашам ыштенна. Нелым, куштылгым ончен огынал. Адакшым йоча годым тидым отат шиж. Паша шукылан туныкта, тудо айдемым пеҥгыдым ышта.

Суворовский училище деч вара 2009 ийыште тунемме икмыняр йолташем-влак дене пырля Рязань оласе армий генерал Василий Маргелов лӱмеш гвардейский кӱшыл юж-десант командный училищыш тунемаш пуренна. Тудым лейтенант званий дене пытаренам. Да распределений почеш 2014 ийыште Бурятий Республикын рӱдӧ олашкыже – Улан-Удэш – логалынам. Тиде жапыштак ӱдырым марлан налынам. Кок икшывына кушкеш. Служебный пачерыште илена. Икшывем-влаклан йочасадыште верым вигак пуэныт. Пелашем тушто врач-педиатрлан пашам ышта».

Вася, шочмо республике деке лишкырак служитлаш йӧн лиеш гын, тушко пашам ышташ каяш келшет мо?

— Тидын нерген ойлаш эр. Мылам кызыт Улан-Удэште служитлаш келша. Адакшым комбат ротын командирже лияш темлен. Мый тидлан ямде улмем шижам, садлан келшенам. Кызыт кугурак лейтенант улам, командирлан шогалмеке, капитан званийым пуат. Конешне, командир –пеш ответственный паша. Салтак-влаклан, тӱрлӧ военный техникылан вуйын шогыман. Ротыштына 80 еҥ шотлалтеш. Тӱрлӧ технике, 10 единице боевой машина уло.

Тений кеҥежым Псков олаште «Десантный взвод» тӱнямбал армейский модмаш лийын. Российын сборныйыштыжо тыят участвоватленат. Модмаш нерген кумданрак палдаре.

– Тушто мый кок ий почела участвоватленам. 2018 ийыште «Десантный взвод» конкурсын эн ончыч Всероссийский этапыштыже лийынам. Тушто тӱрлӧ ола гыч толшо десант команде-влак вийыштым тергеныт. Мыйын командем икымше верым налын. Мыланна тунам Lada Priora автомашинам пуэныт. Тудым ме ужаленна да налме оксам коклаштына пайленна. Вара комиссий Всероссийский этапыште тӱрлӧ таҥасымаште шкеныштым эн сайын ончыктышо участник-влакым сборныйыш поген. Тушко мыйымат ӱжыныт. Командыште – чылаже 32 участник. Но тушеч 22 еҥ веле куржеш. Молышт резервыште улыт. ™маште «Десантный взвод» тӱнямбал конкурсышто 10 команде лийын. Нунын коклаште ме лач Китайым соперниклан шотленна. Взводын кок командирже уло, иктыже – мый.

Таҥасымаш икмыняр этапыште эрта. Кажне этап кӧргӧ вийым йодеш. Икымше этапыште вертолёт гыч парашют дене тӧрштыман. Вара команде ик меҥгым куржеш. Тидым ыштымеке, марш-бросоклан ямдылалташ вич минут пуалтеш. Автомат да салтаклан кӱлшӧ моло тӱрлӧ груз дене 10 меҥгым куржман. Тыгодым ик еҥат командыж деч 50 метр тораште кодшаш да эртен кайышаш огыл. ™маште Псковышто модмаш годым игече чот шокшо лийын. Адакшым, ойлышым, кажне таҥасымаш шуко ӱнарым йодеш. Мемнан командын ик участникше камвозын, шокшылан кӧра ушым йомдарен. Тудым 800 метр кидыште нумалын куржынна. Жапым йомдарен улына гынат, икымше этапыше ме содыки сеҥенна. Каласыман: сборныйышто тылеч посна механик-наводчик-влак улыт. Нуно посна таҥасат.

Кокымшо этапыште лу меҥгым адакат куржман. Вич меҥгым куржмеке, киен мишеньыш автомат дене 10 секундышто лӱйкаленна. 500 метр гыч пулвуйыш шинчын лӱйкалыман. Вара адак тынарак куржман да, шоген, 10 секундышто вич гана лӱйкалыман. Тылеч вара финиш марте ныл меҥгым куржман.

Кумшо этап – эстафете. Тӱрлӧ чаракым эртен куржман.    Нылымше этап – ориентирований. Чодыраште 20-25 меҥгым куржман да контрольный пункт-влакым кычалман.

Тений августышто «Десантный взвод» модмаште 19 команде участвоватлен. Белоруссийын, Иранын, Китайын да Казахстанын сборный командышт моткоч виян лийыныт. Туге гынат ме чылаштым ончылтен кертынна. Мыланна кубокым, Суворовын медальжым да грамотым пуэныт. Суворовын медальже дене пырля вич окладым пуышаш улыт.

– Чӱчкыдын вес олалаш командировкышто лияшет логалеш. Ешет тый дечет посна йокроклана, очыни.

– Военныйын илышыже куштылгыжак огыл. Ученийыш, командировкыш торашке лекташ эреак перна. Ешем тидым умыла да полшен шога, пашам ышташ, у кӱкшытыш шуаш вийым пуа. Лена пелашем — тӱҥ эҥертышем. Неле годым лыпландарыше шомакым эре муэш. ™дыр ден эргына улыт. Эргымже кызыт ачаж гай военный лияш шона. Икшывем-влаклан пример лияш тыршем. Нуным патриотизм шӱлышеш куштем.