Марий КВН лиеш

Кызыт самырык еҥ-влак, проектым возен, тӱрлö конкурслаште участвоватлат. Теве республикна гыч 14 ияш гыч 30 ияш-влак коклаште Российысе молодежный инициативе дене кылдалтше грантым налшаш верч конкурсышто сеҥыше-влакын лӱмышт пале лийын. Йошкар-Олаште шочын-кушшо руш рвезе Никита Краснов «Фестиваль КВН на марийском языке» проектым арален да 300 тӱжем теҥгеаш грантым сеҥен налын.

Тудо Волгатехыште информатике да вычислительный технике факультетыште 5-ше курсышто тунемеш улмаш. Никиталан ты проектым «КВН РМЭ» мер организацийын директоржо Олег Ремизов ден ты организацийыште креативный вуйлатыше сомылым шуктышо Александр Акилбаев полшеныт.

А.Акилбаевым Марий телевиденийыште ончыктымо «Пешком по республике» передачым вӱдымыж дене шукын палат. Фильмлаште, йолын коштшыжла, Марий кундемыштына улшо сылне вершöр дене палымым ышта. Ятыр еҥ тудым рушлан шотла гынат, чынжым гын тудо Йошкар-Олаште марий ешыште шочын-кушкын. Марла огеш мутлане гынат, шочмо йылмым умыла. Шкеже Волгатехыште экологлан тунемын лектын. Студентше годымак КВН-ште участвоватлен. Тунам Республикын КВН сборныйжо чумыралтын улмаш. Жапыштыже А.Масляковын КВН передачыштыже высший Украина лиге командыште участвоватлен. Руш ӱдыр-рвезе-влак дене КВН эре эртаралтеш. Тидын шотышто марий йылме дене эртарен ончаш шонымашышт лектын. Ондак Моско олашке йодмашым колтеныт. Варажым Никита дистанционный йöн дене этап почеш проект пашажым арален.

«КВН-ште 2013 ий годсек участвоватлем. Тушко мыйым кугурак курсышто тунемше студент-влак ӱжыныт ыле. Но ик ий шым кошт, 2015 ийыште уэш модаш тӱҥальым. Вет КВН-ште модын, шуко йолташым муаш лиеш.

Тунемше-влак дене «Юниор-Лиги» КВН лиеда. Сандене кызыт ме Йошкар-Оласе тӱрлö школлашке коштына, тунемше-влак дене вашлиймашым эртарена. Йошкар-Оласе 17-ше №-ан школын кураторжо улам», – ойла Никита Краснов.

Александр Акилбаев дене «КВН РМЭ» организаций, тыгак ты проект пашашт нерген мутланышна. Тудо шкеже индивидуальный предприниматель семын пашам ышта. Рекламым ышта, сценарийым воза, программым вӱда.

«Организаций кодшо ийын гына почылтын гынат, ме тиддеч ончыч КВН дене участвоватленна, ӱдыр-рвезе-влак дене пашам ыштенна. Нунын оҥай мыскараштым тöрленна, мыскарам, сценарийым возаш полшенна.

Организаций почылтмеке, кодшо ий гыч ме тунемше-влак дене пашам ышташ тӱҥалынна. КВН-ын  «Юниор-Лиги» командыжым чумыренна. Тыге ме школ дене пашам ыштена. Кызыт олаште 11 школ команде уло. «Юниор-Лиги» дене кокымшо гана модыш ик тылзе ончыч лие. 13 декабрьыште полуфинал эртаралтеш. А финал – шошым. Тудо Йошкар-Оласе XXX идалык лӱмеш Сеҥымаш полатыште лиеш. Вара сеҥыше-влакым Анапа олашке тунемше-влакын КВН команде фестивальышкышт наҥгаена.

Тыгак кодшо ийын икымше гана «Кубок мэра» лӱм  дене КВН модышым эртарышна. Тушто Республикысе вузла гыч ӱдыр-рвезе-влак модыт. Тений тудо 23 декабрьыште лиеш.

Элна мучко КВН-ште участвоватлыше шуко палымына уло. Пошкудо регионла гыч икмыняр командым ӱжынна ыле.

Кызыт шуко регионышто национальный КВН уло. Мутлан, Татарстаныште шочмо йылмым аралыме шонымаш дене марла гына мутланыше посна лиге уло. Ме тыгак марий йылме дене КВН-ым илышыш пурташ шонышна. Шуко еҥ марла мутлана. Тидыже сай, но эше вес кӱкшытыш шуаш кӱлеш. Ончыкылыклан марий йылме дене КВН-ын икымше кубокшым марла мутланыше еҥ-влак дене эртараш цельым шынденна. Тудым ме вес ийын июнь-августышто эртарен колтышаш улына. Йылмым умылем, сандене текстым шке редактироватлем. Мом огына керт – полшаш йодына. Марий команде-влак дене вашлияш, нунылан ямдылалташышт полшаш тӱҥалына. Кажныж дене куратор лиеш. Тидлан шуко жапым ойыраш шонена.

Мыскара гоч ме ончышо-влакым молан-гынат туныктышаш улына, мыскара шонаш таратыше лийшаш. Марий-влак чоныштым почаш огыт лӱд. Нунын талантан, артист койышан улмышт вигак коеш. Марий КВН-ым ончаш толшо-влак лийыт манын ӱшанена. Кушто эртараш тӱҥалына – але огына пале. Тиде пашам вес ийын вораҥдарена, площадкым муына. Ме самырык-влак коклаште эртаралтше «Росмолодежь»  всероссийский проект конкурсышто проектнам сайлан шотлымышт дене моткоч куаненна», – ойла А.Акилбаев.

Чынак, проект пашашт ойыртемалтше, кӱлешан манын кертына. Кеч республикна мучко тӱрлö мыскара концерт-влак лийыт гынат, але марте марий КВН нерген колалтын огыл ыле. Тыге ончыкылыклан марий ӱдыр-рвезе-влакын мастарлыкыштым, мыскарам ыштен моштымыштым ужына. Тек ты паша вораҥын толеш!