«Марий кундем» эн сайжым гына ончыкта

Я.Эшпай лӱмеш Кугыжаныш филармонийын «Марий кундем» семӱзгар ансамбль (вуйлатыше – Марий Элын калык артистше Алексей Волков) 20 мартыште М.Шкетан лӱмеш Марий театрын сценыштыже кугу концертым ончыкта. Тудо 18 шагатлан тӱҥалеш.

Кугу Сеҥымашлан 75 ий да Марий Эллан 100 ий теммылан пӧлеклатше «Марий кундем» – лучшее!» программыште оркестрын эн сай номерже-влак лийыт.

Оркестрын репертуарже моткоч кумда: руш, марий, татар да моло калык-влакын мурыштым, тыгак руш да вес эласе автор да кызытсе композитор-влакын произведенийыштым, романслам, кумдан палыме кинофильмла гыч муро-влакым темлат.

22 февральыште Республикысе Национальный художественный галерейыште «Музыка в художественной галерее» цикл дене руш композитор Георгий Свиридовын музыкшо почеш А.Пушкинын «Метель» повестьшылан возымо мелодекламацийым ончыктеныт. Сылнымут да сылнысем касым проектын авторжо Марий филармонийым вуйлтышын сомылжым шуктышо Александр Речкин вӱден да повестьым лудын. Ончаш толшо кажне еҥын кумылжым ты кечын сымыктыш тӱня авалтен.

«Самырык тукымым военно-патриотический шӱлышеш кушташ манын, Йошкар-Оласе школлашке «Фронт гыч серыш» программе дене лектын коштына. Оркестрын шоктымыж почеш сар гыч колтымо серыш-влакым лудына, мурым колышташ темлена да чыла тиде шучко пагатым ушештара. Сар ынже лий, йоча-влак тыныс илыш дене илышт манын тыршена.

А 29 февральыште самодеятельный композитор, Марий Эл культурын сулло пашаеҥже Родион Алексеевын усталык касшым «Марий кундем» оркестр сӧрастара. Икымше ужашыште лач оркестрын шоктымыж почеш пайрем озан семжылан келыштарыме муро-влакым лӱмлӧ артист-влак мурат. Тиде программе моткоч сылне лиеш», – мане Марий Элын сулло артисткыже, оркестрын пашаеҥже Елена Николаевна Моржанаева.

«Марий кундем» эреак у программе дене куандара. Семӱзгар дене шоктышо-влак шкештат посна сольный номер-шамычым ямдылат.