Марий йылмым теат тунемнет?
11 январьыште Йошкар-Оласе историй да археологий тоштерыште марий йылме курс почылтын.
Тушко марий йылмым тунемаш шонышо кажне кумылан миен кертеш. Курслан оксам тӱлыман огыл. Занятий-влак шуматкече еда 10 шагатлан тӱҥалеш. Тунемше-влакым кок тӱшкалан шелыт: марий йылмым изиш палыше да палыдыме-влаклан. Ныл тылзе жапыште тунемше-влакым Любовь Алексеевна Абукаева(МарНИЯЛИ), Надежда Васильевна Гусева(МарГУ) да Елизавета Ивановна Игнатьева(Марий образований институт) туныкташ тӱҥалыт. Курс пытымеке, кажне тунемшылан сертификатым кучыктат.
Икымше кечын марий йылмым тунемаш шонышо еҥ ятыр погынен. Нунын коклаште французат лийын. Тудо Марий Элыште идалыкат пеле наре ила. Но шукыракше олаште але посёлкышто шочын-кушшо, марий йылмым палыдыме-влак миеныт.
Марий йылмым палыше группышто тунемаш шонышо-влакым 18 январь марте Эшкинин урем 10А№-ан пӧрт адрес дене вучат. Марий йылмым шагал палыше-влак классыште вер уке. Тушко 50 еҥ погынен.
