25 декабрьыште Моско Кремльысе Кугыжаныш полатыште элнан тÿрлö кундемлаж гыч тÿжем дене йоча-влак погыненыт. Тыште Ёлко пайрем эртаралтын. Марий Эл гыч Кремльысе Ёлкыш 28 икшыве да 6 кугыеҥ миеныт. Нуно Куклачёвын театрышкыже миеныт, пырыс-влакын представленийыштым онченыт, рÿдö катокышто мунчалтеныт, Москвариумышто лийыныт.
Ятыр икшыве элнан рÿдолажым икымше гана ужын. Морко район Нужа кыдалаш школышто тунемше Камиля Фахриева Моско да Ёлко нерген шке шонымашыжым почын пуыш:
– Мылам рÿдола моткоч келшыш. Чылажат öрыктарыше, оҥай. Ёлко пайремыште пеш шукын улыт ыле. Российысе тÿҥ Йÿштö кугызам ужна. Мый кеч юзо коча улмылан ом ÿшане гынат, тудым ужаш куанлын чучо. Тыгак пайремыште йомакласе да мультфильмласе сылне вургеман герой-влак улыт ыле. Нунат пеш келшышт.
Камиля 7-ше классыште тунемеш. Ӱдыр почеламутым лудаш йöрата, сылнымут конкурслаште чÿчкыдын сеҥышыш лектеш. Тыгак Нужа клуб пеленысе «Йолдызчыклар» («Шÿдыр-влак», вуйлатыше – А.Сайфуллина) ансамбльыш коштеш, татар калык куштымашым кушташ йöрата.
Марий Эл гыч Москош мийыше вес чолга тунемше – Анна Кораблёва. Шернур район У Шокшем ялын ÿдыржö кызыт национальный президентский сымыктыш школышто тунемеш.
– Кремльысе Ёлкыш кайышаш нерген пален налмеке, мый моткоч куаненам. Тыге лийын кертеш манын, ÿшаненат омыл. У ий пайрем чот келшыш. Поснак кугу сылне кож ушеш кодеш. Мыланна Йÿштö коча шере пöлекым пöлеклен. «Письмо Деду Морозу» спектакльым онченна, тÿрлö вере экскурсий дене коштынна. Тиде пайремым нигунам ом мондо, – ойлыш Анна.
Москосо У ий йоча-влаклан волгыдо пайрем кумылым пöлеклен. Тунемше-влакым тудо ончыкыжымат тыршен тунемаш, чолга лияш кумылаҥден манын ÿшанен кодына.
