Творческий пашаж дене ойыртемалтше марий драматург Геннадий Гордеев 5 июльышто 60 ийым тема. Тудо марий калыклан ик пьесе почеш весым пӧлекла. Марий самырык театрыште сылнымут пӧлкам вуйлатыше шке лӱмгечыжланат пӧлекым ыштен – эше ик пьесым возен шуктен. Тудым вес тургымышто Эрвина ӱдыржӧ шындышаш.
Йӧратымаш дене таҥастара
Пьесын кузе шочмыжым драматург гына сайын пала. Тудо кажне геройжын илышыжым шӱм вургыж илен эртара. Пьесе возалтеш да спектакль ончыкталтеш гын, автор геройжо-влак дене «ойырлымеке» шортеш. Шинчавӱд денак. Йӧратыме еҥже-влак дене ойырлымо семынак ойгыра. Варажым чонышто тиде пусталыкым кораҥдаш манын, вес пьесысе образ-влакын койышыштым, действийыштым шонкалаш пижеш. Адакат нунын дене пырля идалык наре але утларак жап ила…
«Вес еҥым йӧратен шындыме шижмаш годым уло кӧргӧ чон дене вургыжат, орланет. Возымо процессат йӧратымаш сынан. Пытартыш жапыште чонемым Тамара Ситникован мурымо «Тораште тый улат» ден «Ужаргалше сад» мурыжо-влак лыпландарат. Тыгак весела кумылым Игорь Антроповын шукерте огыл шочшо «Канде муро» пашаже пурта. Тӱрлӧ образ ден герой-влак кӧргӧ чонемым индырыме годым муро-влак чонемым шыматат, куштылемдат. Шукерте огыл музыкальный комедийым возен пытарышым, «Ик ялыште – кум сӱан» маналтеш. Кызыт драме шӱлышан пьесылан пижынам, Сайна героем дене пырля улам. Келге психологический образым ыштынем. Тидлан мыланем лирический муро-влак полшат. Но кызытеш паша пеш нелын, эркын кая.
Пьесым возымо годым шкемым виешлаш ом тырше: геройын чонжым, кумылжым шижын илем. Кузе пасушто лыве вашкыде чоҥештылеш, тыгак усталык пашаште шулдыраҥын илыман. Шинчам кумен возам, кажне геройын образышкыже шыҥем… Тыге эркын дене драме шочеш. Вара актёр-влак персонажын образыште «илат»: вургыжыт, орланат. Герой-влакымс ончаш толшо еҥ-влак йӧратен шындат, спектакль деч вара зритель-шамычын чонышт пелен шаланен пытат. А мыйын чонышто йокрок, йӧсӧ лиеш», – манеш Геннадий Филимонович.
Сай суртоза
Эрвина
Эвина
«Марий шочынам»
Нине теме-влакым авалтыме статьям УМБАКЫЖЕ «Кугарня» газетыште лудаш темлена.