Лӱмгече вашеш ончычсо тӱҥ редакторлан Шарнымаш оҥам почмо

13 мартыште Кужэҥер поселкышто Марий Элын калык писательже, Кугыжаныш премийын лауреатше Виталий Петуховлан Шарнымаш оҥам почмо.

Курыкмарий кундемын шочшыжо Виталий Альбертовичлан ӱмыржым утларакше Кужэҥер районышто эртараш логалын. 1982 ий гыч тысе «Заря» райгазетын тӱҥ редакторжылан 33 ий пашам ыштен. 1993 ийыште Марий Элын сулло журналистше лӱмым сулен. Эн кугу пашажлан «Акрам» исторический роман шотлалтеш. В.Петуховын ӱмыржӧ 2016 ийыште кӱрылтын.

— Чапланыше еҥын пашажым мондаш огыл манын, Кужэҥер район гыч тунам эше Мер каҥашын еҥже М.Григорьев Марий калык конгрессын погынымаштыже Шарнымаш оҥам почаш кӱлмӧ нерген ойлен. Мер ушемын еҥже-влак йодмынам колыныт. Республикысе тӱвыра печать да калык-влакын пашашт шотышто министерстве гоч окса надыр ойыралтын, мыняржым мемнан редакций муын. Ты пашашке шке надырым пыштымылан кажнылан тауштена, — каласыш «Заря» райгазетын тӱҥ редакторжо Н.Глушкова шарныктыш оҥам почмо годым.

Торжественный погынымаште В.Петуховын суапле пашажым республикысе Кугыжаныш Погын председательын алмаштышыже, МарНИИЯЛИ директор Е.Кузьмин, Кужэҥер районысо депутат-влак погынымашым вуйлатыше О.Фокина, Марий книга савыктышын директоржо Ю.Соловьев, Виталий Альбертовичын Лидия пелашыже да молат порын шарналтеныт. Коллегыналан Шарнымаш оҥам почмаште «Кугарня» газет редакций да Марий калык конгресс лӱм дене мыламат лияш логалын.

Шарнымаш оҥам районысо редакций пашаеҥ-влак шке пайремышт вашеш почаш палемденыт — тений 14 мартыште «Заря» газетын лекташ тӱҥалмыжлан 85 ий темын.

Э.Иманаев.

О.Фокина
Е.Кузьмин
Ю.Соловьев
Л.Петухова
Э.Иманаев
Пеледыш аршашым пыштымаш
В.Петуховлан Шарнымаш оҥам почмашке мийыше-влак.