Катя дене Марий Эл радиошто палыме лийынна. Ӱдыр, йоча годсо шонымашыжым шукташ манын, радиовӱдышӧ семын вийжым тергаш толын ыле. Тылеч посна тудо шке мастарлыкшым тӱрлӧ могырым нӧлта.
Екатерина Стрелкова Йошкар-Олаште шочын-кушкын. Медведево посёлкысо 2-шо №-ан школышто тунемын. Школышто тунеммыж годым журналист але кусарыше лияш шонен. Икымше класс годсек Катя Медведево посёлкысо тӱвыра пӧрт пеленысе «Позитив» образцовый студийыш кушташ коштын. Кугурак класслаште баскетбол командыште модын. Но кушташ утларак йӧратен.
2016 ийыште коллектив дене «Михаил Мурашко приглашает друзей» конкурсышто у куштымашым ончыктеныт да сеҥышыш лектыныт. Тидыже эшеат кугу шӱкалтыш лийын да кугу кӱкшытыш шуаш кумылым луктын.
Индешымше класс деч вара Катя И.Палантай лӱмеш тӱвыра да сымыктыш колледжыш тунемаш пураш шонен. Кок ий жапыште ала шонымаш вашталтеш манын, школыштак кодын. Школ деч вара МарГУ-шко балетмейстерлан тунемаш пурен.
«Туныктышо лияш шонен омыл, но тунемаш келша. Йоча-влак дене пашам ышташ шуко вий кая, тыгодымак нуно ешартыш ӱнарым пуат», – каласыш Катя. Балетмейстер лияш куштылго огыл. Шуко ӱнар, чытымаш кӱлыт. Сандене пуанты дене шогаш да кушташ тунемаш К.Стрелкова шуко жапым ойыра.
– Икымше курс гыч пуанты дене шогаш тунемынна. Кокымшо семестрыште шогалын моштенна. Икымше гана шогалме годым шинчавӱд лекмеш корштен. Эн ондак йоллан йӧндымӧ ыле. А вара тунемалтын. Ме шуко тренировкым, тӱрлӧ растяжкым, зарядкым ыштена. Чыла тидыже мыланна сайрак кушташ, комбинацийвлакым ышташ полша», – каласыш ончыкылык туныктышо.
Ӱдыр яра жапыште сӱретлаш, лудаш йӧрата. Сандене шке вийжым тӱрлӧ конкурслаште терга. Шке возымо почеламут ден ойлымашыже-влакым лудеш. Мутлан, 5-6-шо класслаште тунеммыж годым Николай Арбан лӱмеш сылнымут конкурсышто участвоватлен.
Катя тыгак брошь-влакым ышта але вургемыш сӱретым тӱрла. «Ондак джинс курткышкем тӱрлӧ сӱрет-влакым тӱрленам, вара – футболкыш, тунамак брошь-влакым ышташ кумылаҥынам. Тӱҥалтыш класслаште тунеммем годым шер дене кидшолым, тӱрлӧ модыш-влакым ямдылыме занятийлаш коштынам. Вара тиде паша мондалтын. 2016 ийыште Интернетыште шер да мулине шӱртӧ дене ыштыме тӱрым ужынам. Тӧчен онченам, келшен. Умбакыжет тӱрлӧ видео-влакым ончен ышташ тӱҥалынам. Кызыт шканем веле огыл, йолташем-влаклан ыштем», – каласыш ӱдыр.
Эн сай каныш – вес пашам ыштымаш. Тыге Катя вийым пога. А вара уэш йӧратыме сомылжылан пижеш. Ме Екатериналан сайын тунемаш тыланена. Ӱшанена: тудо сай туныктышо лиеш.
Еш альбом гыч налме фото.