Кугу надырым ыштет гын, ужыт да аклат

 

14 мартыште 65 ияш лӱмгечыжым Россий сымыктышын сулло пашаеҥже, Марий самырык театрын художественный вуйлатышыже О.Г.Иркабаев палемден. Лӱмлӧ режиссёрым ятыр пашажлан акленыт. «Театральный Йошкар-Ола» фестивальыште гына куд гана лауреат лийын, «За заслуги перед Республикой Марий Эл» орденын медальжым, М.Шкетан лӱмеш Кугыжаныш премийым сулен.

– Олег Геннадьевич, айста пытартыш вич ийыште шуктымо пашада-влакым ончалына.

– Шуко паша театр дене кылдалтын. Эн кугу событий – 2015 ийыште Марий самырык театрна посна полатыште пашам ышташ тӱҥале. 2002 гыч 2015 ий марте Шкетан лӱмеш театрын филиалже лийынна. Тыште мыйын шындыме ятыр у спектакль ончыкталте. 2015 ийыште Зинаида Долгован пьесыж почеш «Немыч вате» спектакльым шындышым, Иван Гончаровын романже почеш – «Обломов. Теперь или никогда» спектакльым. Ты постановкым Москошто эртаралтше «Школьная классика» фестивальыште 2018 да 2019 ийлаште ончыктышна. Классике кокла гыч Денис Фонвизинын пьесыж почеш «Недоросль» спектакльым шындышым. Варажым Александр Петров ден Зинаида Долгован пьесышт почеш «Кунам толат, авай?» постановко шындалте, Мария Илибаеван – «Торешвате солаште – томаша», Виктор Ляпинын пьесыж почеш Геннадий Гордеевын марий сценылан келыштарыме – «Сӧсна поминка деч вара».

Тылеч посна 2016 ийыште Шкетан лӱмеш Марий драмтеатрыште Миклай Рыбаковын «Эргымлан кузык» пьесыж почеш спектакльым шындышым, Александр Островскийын пьесыж почеш «Чын улат – сай, пиалан гын – сайрак» постановкышто режиссёр пашам шуктышым. 2017 ийыште Курыкмарий драмтеатрыште мыйын шындыме «Савик» спектакль дене тургымым почыч.

Марий самырык театрын труппыжо тӱрлӧ фестивальыш миен коштын, актёр-влак ятыр сеҥымашыш шуыныт. Ныл ий ончыч Палантай лӱмеш тӱвыра да сымыктыш колледжыште актёр-влакын курсыштым погенам. Кызыт диплом спектакль-влакым лукташ ямдылена.

– Олег Геннадьевич, Тендан шуктымо пашалан эн кугу акым кӧмыт пуэныт?

– «Эн сай режиссёр» семын палемдыме ак – эн кугу аклымаш. 2018 ийыште «Йошкар-Ола театральная» фестивальыште жюри «Савик» спектакльым эн сайын шындыме манын ыле. Тунамак мыланем фестивальын оргкомитетше «За честь и достоинство» национальный премийым кучыктен. Тылеч посна эн сай шомакым мыланна зритель-влак каласат. Нунын аклымышт, кажне спектакль деч вара совым кужун кырымышт, шыргыжалын куанымышт, «бравом» кычкырымышт эн чот шерге.

– А личный илышыштыда могай вашталтыш-влак лийыныт?

– Пытартыш вич ий событийлан поян лийын. Кум ият пеле ончыч йыгыр уныкам-влак, ӱдыр ден эрге, шочыныт. Тыге Света ӱдырем кум шочшан ава лие. Ты пагытыштак эргынан Елисей эргыже шочо. Сандене вич уныкан лийым.

Кодшо ийын Моско область Ступино олаште илыше ӱдырем марлан лекте. Екатерина «Домодедово» аэропортышто кофем шолтышо специалистлан, баристалан, пашам ышта. Тудо И.С.Палантай лӱмеш тӱвыра да сымыктыш колледжыште режиссёрлан тунемын, Москошко театральный институтыш тунемаш пураш кайыш. Тунам пурен ыш керт да, вес ийынже угыч экзаменым кучем манын, Москоштак кодо. Ынде ты профессий гыч кораҥын.

Кок ий ончыч Алексей эргым ӱдырым нале. Ешыж дене Моско область Серпухов олаште ила. Тудо бизнесмен, Москошто да моло олалаште йодмо почеш тӱрлӧ культурно-массовый мероприятий-влакым эртараш изирак фирмыже уло.

– Палыме шуэш: кузе Олег Геннадьевич отпускшым эртара?

 

ТИДЫН нерген умбакыже «КУГАРНЯ» газетын 13 мартысе номерыштыже лудаш темлена.