«Кугарня» газетын миссше

Шукерте огыл идалык наре эртаралтше «Кугарня» газетын миссше фотоконкурсна иктешлалте. Редакцийышкына моткоч шуко серыш ден фото-влак толыныт ыле. Сеҥыше-влак кокла гыч иктыже – Шернур район Токтамыж ялыште шочын-кушшо Анна Копаева. Тудын дене вашлийын мутланаш йöн лие.

 

Сеҥымашет дене саламлена, Анна. Конкурсыш кузе ушненат? Чоныштет кызыт могай шижмаш?

Конкурс годым савыкталтше фото

 

– Конкурсыш ик палыме ÿдыр ушнаш таратен. Тудлан мыйын марий тувыран фотоэм келшен улмаш. А мый вес сайрак фотом ямдылаш шонен пыштышым. Пелашемын коваже Роза Токпаева шке ÿдыржылан моткоч сылне сÿан вургемым урген ыле. Фотошто мый лач тудым чиенам, Шернур район Орехово ял уремыште шогем.

Сеҥем манын шоненат омыл. Тиде вучыдымо увер лие. Фотом колтенам да чыла. Авам, ава лийшем да ковам «Кугарня» газетым налыт, лудыт. Нуно сеҥымем нерген ойленыт, моткоч куаненыт. Тидыже – мыламат куан, – ойла Анна.

 

– «Кугарня» газетын миссше нерген шукырак палыме шуэш: кöлан тунемынат, кушто илет, могай пашам ыштет?

– Кызыт мый Йошкар-Олаште илем. Ешан улам, кум ияш ÿдырем уло. Ик микрофинансовый организацийыште пашам ыштем. 2015 ийыште Марий кугыжаныш университысе Аграрно-технологический институтышто технологлан тунем лектынам. Вара Волгатехыште ялозанлык продукцийын качествыжым тергыме пашалан тунемынам.

– Тылеч ончыч иктаж конкурсыш ушненат мо?

– МарГУ-што тунеммем годым Российысе научно-технический проектым ыштыше самырык шымлызе-влаклан эртаралтше «Умник» конкурсышто участвоватленам да грантым сеҥен налынам. Тÿрлö конференцийлаште лиеденам, шымлымаш паша-влакым возенам.

– Яра жапыште могай сомылым шуктет?

– Книгам лудам. Фэнтези сынан сылнымут произведений-влак келшат. Нуно ушым кандарат, тÿрлö кÿлдымаш шонымаш деч кораҥаш полшат.

– Кузе шонет, паша вораныже да лектышан лийже манын, илышыште мом шотыш налман?

– Шкалан ÿшаныман. Ыштышаш сомылым варалан кодыман огыл манын шонем. Мутлан, мыйын иктаж-могай пашам ыштыде кодеш гын, чонлан моткоч йöсын чучеш. Садлан кажне кечын (але ик кече ончыч) мом ыштышаш нерген спискым ямдылем. Тушто чыла возем: иктаж-куш миен толшашымат, кочкаш шолтымымат, шÿкым лутын кудалтымымат. Тиде але тудо пашам шуктымеке, «галочкым» шындем. Кажне у пале кумылым нöлта, вес сомыллан пижаш кумылаҥда. Тыге нимо мондалтын ок код.

Тыгак кажне кечым сай кумыл дене тÿҥалман. Воштончышыш ончалын шыргыжалман. Тыгодым «Мый мотор улам, ушан улам, мыйын чыла пашам ворана» манын ойлыман. Эре сайым шонаш тыршыман. Поро кумылым воктене улшо-влакат шижыт. Мутлан, икшыве кугурак-влакым шыргыжшым ужеш гын, шкеат веселаҥеш.

– Вашке У ий. Лудшына-влаклан мом тыланет?

– Таза лийза. Тудым оксала от нал маныт вет… Тек у ийыште чÿчкыдынрак пиал шыргыжеш. Кажнылан. Тек чыла поро шонымашда шукталтеш.

– Тау, Анна.