Куатым муро ешара

Марий эстрадыште Аксар Эльтемеровын лÿмжö шукылан палыме. 2009 ийыште«Тыйын верч» мурыж деч вара тудын нерген утларак ойлаш тӱҥальыч. Мурызо шкежак шомакым воза, семым келыштара.

 

Олор ялын уныкаже

Параньга район Олор ялын эргыже Альберт Владимирович Эльтемеров шке ялысе Ольгам школышто тунеммыж годымак йöратен шынден. Рвезе мастар кидан лийын гын, ÿдыр оҥгыр гай йÿкан, лывырге кид-йолан, мураш-кушташ мастар улмыж дене ойыртемалтын. Ешаҥмекышт, шкешт гай поро, ушан-шотан, чолга кум икшыве: Аксар, Марина, Сергей – шочыныт. Нунын кокла кокла гыч  эн кугужо – Аксар.

Эльтемеровмыт еш ондак Советский район Вечын посёлкыште илен, 1988 ийыште Кодам ялыш куснен. Лач тиде ялыште рвезын весела йоча пагытше эртен. Аваже «Матрёшка» йочасадыште воспитательлан тыршен, ачаже колхозышто пашам ыштен. Мурен моштымыжо, почеламутым возымыжо рвезылан аваж деч куснен. Вет Ольга Константиновнан изаже-влак сайын мурен моштымышт дене шке таҥаш рвезе-влак коклаште ойыртемалтыныт. Аксарын шÿжарже Марина Эльтемерова – изаж гаяк чолга, творческий шÿлышан ÿдыр. Илыш корныжым тÿвыра дене кылден, тудо И.С.Палантай лÿмеш колледжын пашаеҥже,  «Чинчывий» кÿслезе ансамбльым чумырен.

 «Авам музыклан шÿманден. Тудо концертлаште чÿчкыдын выступатлен, мурен, куштен. Сандене авам дене пырля эре коштынам. Ондак ончышо семын миенам гын, вара «Матрёшка» йочасадын коллективше дене пырля мыят концертлаште выступатленам. Лач тиде пагыт гыч музык келшаш тӱҥале. Тунам йочасадыште музыкальный кружокым Людмила Васильевна Рыбакова вÿден. Тушто ме тÿрлö семÿзгар дене шокташ тунемынна, мурым муренна. Авам фортепиано дене шокташ кок тылзаш посна курсышко пуэн ыле», — ойла мурызо.

 

Сӱретлаш мастар

Аксар музыкым веле огыл, тыгак сÿретлаш йöратен. Рвезе ачажын пушеҥгыш пӱчкеден сÿретлымыжым кажне гана эскерен ончен.

«Ачамын пашаже-влак 1990-ше ийлаште районысо художественный выставкылаште ик гана веле огыл ончыл верышке лектыныт. Сандене южгунам Саша тукым изам дене шке семын але сÿрет почеш сÿретлена, чиялтена ыле. 4-ше класс деч вара Йошкар-Оласе национальный музыкально-художественный президентский школышко «сÿретче» направлений дене тунемаш пуренам», — каласкалыш А.Эльтемеров.

Музыкально – художественный школышто сÿретче лияш ямдылалтше рвезе музыкым öрдыжкö шÿкалын огыл.  Школ-интернатыште музыкальный класс лийын. Аксар тушто тунемше ÿдыр-рвезе-влак пелен эре лийын.

 «Ме пырля выставкышке, концертышке коштынна. Тушто музыкальный инструмент дене шокташ йöн лийын. Пианино дене сайын шокташ тунем шуым. 5-ше класс гыч танцевальный музыкылан кумылаҥынам, аудиокассетым эре налын шогем ыле», — ойла Аксар.

 

Почеламутым возен, спортым йöрата

А.Эльтемеров 10-11-ше класслаште Кодам школышто тунемын. «Тунам танцевальный музыкын, мурын, музыкальный композицийын ойыртемыштым шымлаш тÿҥалынам», — тудо ойла.

Тиде жапыштак почеламутым возен, шке семын гитаре дене шоктен.

Тыгак спорт дене кылым кучен. Урок деч вара спортивный кружоклашке коштын, тренажёрный залыште заниматлен. Рвезе ончыкылык профессийым спорт дене кылдаш шонен. Школ деч вара Крупская лÿмеш Марий пединститутын физический воспитаний факультетышкыже физкультурым туныктышо специальность дене тунемаш пурен. Студент пагытше годым «Марий мурсем» ансамбльын ик чолга участникше лийын. Лач нине ийлаште пырля тунемме йолташыже-влаклан шке мурыжо-влакым мурен.

Институтым тунемын пытарымеке, армийышке налыныт, внутренний войскан ик частьыштыже служитлен.

 

Москошто пашам ышта.

2007 ий гыч тачысе кече марте Москошто Россий МЧС-ын пожар ваштареш кучедалме службыжын кугыжаныш академийыштыже физической подготовко да спорт кафедрын старший преподавательжылан пашам ышта. Аксар Марий радион ондакысе пашаеҥже Ольга Савиновам марлан налын. Кызыт Ольга – России МЧС-ын  элкöргö службо капитанже.  Кок икшывышт уло.

Аксар яра жапше годым семым воза, мурылан ремиксым ышта. Кызыт тудын 88 муро пашаже уло.Тушко ремикс, микс, сем-влак пурат.  Рвезе рушлат изиш мурым воза.

«2008 ийыште семым возымо программым шке гыч ончен тунемынам, тудын почеш музыкальный композицийым возаш тӱҥальым. Шке гыч гына тунемме шагал, сандене ди-джей Груван аудио школ курсышым тунем лектынам. Тыште ди-джей, музыкант-влакым ямдылыме шотышто тÿрлö курсым эртенам. Куштымо стильлан келыштарыме музыкальный композиций, муро-влак поснак келшат, сандене тидлан жапым утларак ойырем. Шуко мурызо дене палыме улам, йодмышт почеш мурыштлан ремиксым ыштем»,– ойла рвезе.

Кызыт Аксарын репертуарыштыже 33 марий муро уло, южыжо калык коклашке але марте лектын шуын огыл, лишыл жапыште йоҥгалтшаш улыт. Аксар Эльтемеровын творчествыже шкешотан, а мурыжо-влак чонеш логалше, шонаш таратыше улыт.