Медведево районышто илыше 50 ияш ӱдырамашлан банк пашаеҥ улам манын йыҥгыртеныт. Тудын банк картын данныйжым пален налыныт да карте гыч 450 тӱжем теҥгем шолыштыныт.
Россий МВД-н Йошкар-Оласе да Воронеж областьысе уголовный розыск пашаеҥже-влак дене пырля Санкт-Петербург олаште илыше 32 ияш мошенникым кученыт. Тудо тӱрлӧ регионышто илыше-влакым ондален. Интернетыште сатум ужалыме нерген уверым вераҥден. Налаш шонышо еҥын кумылаҥмекыже, оксам тӱлаш йодын, а вара «йомын». Кызыт мошенник ваштареш индеш уголовный пашам тарватыме.
Йошкар-Оласе ик дежурный частьыш ола покшелне пудешталтме нерген увер пурен. Терген лекмеке, тыгай лиймым пален налме огыл. Шоя уверым пуышо пӧръеҥлан ик миллион теҥге наре штрафым тӱлыктен але кудыт гыч кандаш ий марте тюрьмаш шынден кертыт.
Звенигово олаште илыше 36 ияш пӧръеҥ Интернет лаштыкыште машиналан шапаш ужашым ужалыме нерген уверым ужын. Ужалыше дене кутырен келшымеке, кондымылан 400 теҥгем ончылгоч тӱлен. Почто дене икмыняр жап гыч йоча кидшагат гына толын.