Кримувер

Йошкар-Олаште илыше 38 ияш пӧръеҥын телефонышкыжо Моско областьысе номер гыч (код 495) йыҥгыртеныт да банк картше гыч оксам шолыштыт манын ойленыт. Ондален, картын чыла данныйжым пален налын ыле, 145 тӱжем теҥгем шолыштыныт.

Волжский районышто илыше 50 ияш пӧръеҥым тений мартыште автомашинам йӱшывуя виктарышыжла кученыт да 30000 теҥге штрафым тӱлаш пуэныт да тыгак идалыкат пелылан праважым поген налыныт. Кодшо кечылаште пӧръеҥ права деч посна машинам виктарышыжла логалын. Уголовный делам тарватеныт.

Звенигово районышто илыше 70 ияш ӱдырамашлан йыҥгыртеныт да БАД-ым налме организаций петыралтме нерген ойленыт. Тидлан ӱдырамашлан оксам пӧртылташ сӧреныт. Но ондак госпошлиным тӱлаш йодыныт. Ӱдырамаш почто гоч 62 тӱжем теҥгем колтен. Кокымшо гана банкыш тӱлаш толмыж годым банк пашаеҥ-влак мошенник-влаклан оксам колтымыж нерген ойленыт.