Йошкар-Оласе Свердлов урем дене эрдене ошкылшо 18 ияш ӱдырын кидше гыч пӧръеҥ сумкам налын куржын. Тыгак кидыште улшо телефонжымат руалтен. Патруль службын пашаеҥже-влак титакан еҥым кученыт: Медведево район гыч 24 ияш рвезе лийын.
У Торъял посёлкышто илыше 37 ияш пӧръеҥ шке велосипедшым йӱдлан подвалыште вӱд пучеш трос дене пижыктен коден. Эрдене оза велосипедшым верыштыже ужын огыл.
Волжск олаште илыше 63 ияш пӧръеҥ Интернетыш пушым ужалыме нерген уверым возен. Налаш шонышо лектын, сатулан оксам колташ сӧрен. Тидлан банк картын данныйжым йодын. Ужалыше йодмым шуктен да SMS дене кодым ойлен. Тыге картше гыч 20500 теҥгем шолыштыныт.