Медведево районысо Краснооктябрьский тӱвыра пӧртыштӧ тоштер уло, тушто кажне экспонат, арвер нерген оҥай историйым пален налаш лиеш.
Тӱвыра пӧртым вуйлатыше Татьяна Семёнова мыланна шкешотан экскурсийым эртарыш. Тудо тыште 2014 ий годсек пашам ышта, да кажне шуктымо сомылжо чонжылан лишыл. Татьяна Михайловна тыгак Краснооктябрьский кыдалаш школышто тӱҥалтыш класслаште туныкта. «Мылам школыштат, клубыштат пашам ышташ моткоч келша. Адакшым йоча-влак тӱрлӧ кружоклаш коштыт, музыкальный школышто яра заниматлат, кидпашалан тунемыт. Школ деч вара клубышкына кружокыш шукын толыт. Тӱвыра пӧртыштына «Город мастеров», «Ивушка», «Витамин роста», «Карамель» да моло кружок-влак, «Художественное слово» студий да брейк-данс дене кум группо пашам ыштат. Кугурак-влак «Кудёрушки» ансамбльыште чоныштым кандарат, ты коллективлан 35 ий темеш», – мане Татьяна Семёнова.
«Город мастеров» кружокын пашаже-влак тысе тоштерыште аралалтыт, моторлыкышт дене пӧлемым пойдарат. Моло пӧлемлаштат кидпаша-влакым ужаш лиеш. Кружокым Наталия ден Юрий Андреевмыт вуйлатат.
Корасноктябрьскийыште илыше-влак пытартыш жапыште уэш «Посёлкын кечыже» пайремым эртарат. Тидлан Татьяна Михайловна кумылаҥден шога. Ты кундемыште улшо предприятий ден организаций-влак концерт программым ямдылат да шке усталыкыштым ончыктат. Тидыже икте-весе дене келшен илаш тарата. Тыгак 9 Май кечым чылан вучат. Тунамат кугу концерт тӱнӧ эртаралтеш. Самырык-влак дене пашам ыштыме годым видеофильмым, илыш гыч сюжетым кучылтыт, наркотик, СПИД, тамакым шупшмо да моло зиян деч аралалташ да туддене кылым кучаш огыл манын, умылтарымаш пашам шуктат. Призывникын кечыжым эртарат, викториным, модышым темлат.
Краснооктябрьский школышто 500 утла йоча тунемеш, нунын урок деч вара жапышт пайдалын эртыже манын, клубышто ятыр мероприятий шукталтеш. Йошкар-Ола гыч лӱмынак брейк-дансым туныкташ Петр Колесников коштеш. Ондак ик группо гына лийын ыле, ынде кумыт чумырген, Йошкар-Олашке ты куштымаш дене батлыш миеныт.
Кызыт Ӱарня арня веселан эрта, 1 мартыште еҥ-влак телым ужаташ ямдылалтыт. Садлан ӱян мелнам тамлаш, мурен-кушташ, веселитлаш уэш уремыш погынат.