Икмыняр ий ончыч Советский район Роҥго села гыч самырык рвезе Павел Суворов Советский посёлкышто, Йошкар-Ола – Уржум кугорно воктене, активный каныме базым ышташ шонен пыштен. Тудлан Владимир изаже тиде пашам тӱҥалаш полшен. Изирак кумдык мландым арендыш налмеке, рвезе-влак пашалан пижыныт. Тунам нуно шкеак шудым соленыт, пундыш-влакым кукленыт да пейнтбол дене модаш площадкым ыштеныт. Тиде 2013 ий августышто лийын. Сентябрьыште икымше гана еҥ-влак канаш толыныт. Вара рвезе-влак беседкым да мончам, эше ик ий гыч каныме пӧрт-влакым чоҥаш тӱҥалыныт.
Кызыт «Экстрим-паркыш» уло республик гыч канаш толыт. Советский, Марий Турек, У Торъял, Шернур, Кужэҥер районла гыч гына огыл, Волжск ден Звенигово районла, Йошкар-Ола гычат мият. Тыште йолташ але родо-тукым дене погынен канаш, пайремым эртараш чыло йӧн уло: 80 еҥлан кугу банкетный зал, оцилиндрованный пырня дене ыштыме 20-25 еҥлан кок беседке, кок монча, 10-15 еҥлан кок пачашан икмыняр пӧрт, бильярд дене модаш пӧлем. Кажне пӧртыштӧ да беседкыште телевизор, музыкальный центр улыт. Телым пӧлем-влакым ырыкташ лӱмын изирак кӱртньӧ коҥга-влакым шындыме. Тыгак кажне пӧрт воктене шашлыкым ышташ мангал уло. Телым ватрушко дене мунчалташ пу дене ыштыме кугу курыкым, йоча площадкым, лӱҥгалтышым келыштарыме. Активный канышым йӧратыше-влаклан – пейнтбол да лазертаг дене модаш площадке, квадроцикл-влак. Кеҥежым скалодромыш кӱзаш да вышке гыч канат дене волаш лиеш.
«Экстрим-паркыш» утларакшым шочмо кечым, лӱмгечым, сӱаным, сӱанын кокымшо кечыжым, У ий корпоратив-влакым кугу тӱшка дене эртараш толыт. У ийымат эсогыл тыштак вашлийыт. Еҥ-влак кас гыч эр марте ешышт, йолташышт да лишыл еҥышт дене жапым веселан эртарат. Школла, йочасадла гыч выпускнойымат пайремлаш толыт. Тӱрлӧ кундемласе школла гыч йоча-влак кафеште огыл, а пӱртӱс лоҥгаште, активный модыш дене модын эртараш кумылан улыт. Шукертак тунем пытарыше выпускник-влакат тыште вашлияш йӧратат. 23 февраль, 8 Март пайрем-влакымат еҥ-влак яндар южышто пайремлат.
«Экстрим-парк» активный каныш базын вуйлатышыже-влак деке тӱрлӧ верла гыч полышым чӱчкыдын йодын толыт. Рвезе-влак полшаш эреак ямде улыт. Икана Советский район администраций гыч ача да ава деч посна кодшо йоча-влаклан полышым пуаш йодын толыныт. Рвезе-влак, шуко шоныде, каныме базыштышт нине йоча-влаклан оксам тӱлыде канаш темленыт. Тыге ынде икмыняр ий Йоча-влакым аралыме кечын республикнан тӱрлӧ районлаж гыч ача-ава деч посна кодшо йоча-влак тыште яра канат. Инвалид кечылан начар тазалыкан йоча-влак тышке толыт. Рвезе-влак вес организаций-влакланат полшаш тыршат. Мутлан, кок ий ончыч «Идалыкын воспитательже» конкурсышто сеҥышылан канаш сертификатым пуэныт. Теният тыгай йодмаш пурен.
«Экстрим-паркыш» пайремым эртараш гына огыл, еш дене тыглай каналташ толаш темлат. Тыште изи икшывыланат, кугыеҥланат келшыше модмаш-влак улыт. Модын ситарымеке, шокшо мончаште капым кандараш да шокшо чайым подылаш лиеш.
