Юрино посёлкышто илыше еҥ-влак Шереметевын замкыж дене кугешнат. Кажне ийын тушко Российын тӱрлӧ регионлаж гыч гына огыл, вес элла гычат турист-влак толыт.
Замкын историйже 1812 ий гыч тӱҥалеш. Тунам Юрино селам Угарман губернийысе поян помещик Василий Сергеевич Шереметев налын. Вара поместье эргыже Сергей Васильевичлан куснен. Замокым Сергей Васильевичын шӱжарже Юлия Васильевнан эргыже, Василий Петрович, ден пелашыже Ольга Дмитриевна Шереметевмыт 1874 ийыште чоҥаш тӱҥалыныт. Колымекышт, уло поянлык эргыштлан, Пётр Васильевичлан, куснен.
Шереметевмыт замокым тӱзаташ оксам чаманен огытыл. Проектым немыч зодчий Р.Мюллер ыштен. Тудо икмыняр архитектур стильым иктеш ушен. Замокым 40 ий чоҥымо жапыште тушто куд архитектор пашам ыштен, кажныже мом-гынат уым пурташ тыршен. Кӧргӧ могырысо пырдыж-влакым тумо да ош мрамор дене сӧрастарыме. Оза-влак Франций да Италий гыч мебельым, шуэн вашлиялтше книга-влакым, кумдан палыме сӱретче-влакын радынаштым конденыт, а кӱварыш мозаикым пышташ Италий гыч лӱмын мастарым, Ерме Кристофолим, ӱжыныт.
Революций деч ончыч, 1916 ийыште Пётр Васильевич колен. Шӱжарже-влак вес вере илаш каеныт, сандене замок калыкын кидышкыже логалын. 1918 ийыште тиде чапле зданий Угарманысе кадет корпусыш савырнен. 1923 ийыште тушто Угарманысе икымше трудовой школ-коммуно почылтын. Вара тышан унагудо, каныме санаторий лийыныт. Кугу Отчечественный сар жапыште тушан госпитальым почыныт.
XX курымысо 90-ше ийла марте замок йӧршеш тоштем шуын. 2000 ийлаште гына тушто ачалыме паша тӱҥалын. Икмыняр пӧлем эшеат ачален шуктымо огыл, сандене тушко ончаш толшо-влакым огыт пурто.
Замокышто – 100 пӧлем. Кажныжын шке историйже да стильже улыт. Зданийыште шуко тошкалтыш, коридор, картинный галерей, икмыняр кугу зал да кабинет, телымсе сад да тулеч молат улыт.