Мылам южгунам тыге чучеш: ялыште тӱвыра илышым арален кодышо-влак утларак улыт. Кеч-кудо кундемыш лек, тӱвыра пӧрт пелен ансамбль-влак аралатыныт. Ялыште кеч ик чолгаъеҥ лекше, илыш иканаште пеледалт кая.
Провой вел Поянсолаште Платуновмыт еш ила. Валерий ден Лидия коктынат усталык шӱлыш дене вӱдылалтше улыт. Лидия Алексеевна клубышто художественный вуйлатышылан ышта, стажше — 27 ий. Валерий Москошто чывек фирмыште пашам ышта. «Икмыняр ий Москошто ик эмлымверыште ороллан пашам ыштышым. 2017 ий 22 ноябрьыште угыч ялысе клубышко пашаш пурышым. Вигак тӧрлымӧ-ачалыме сомыллан пижна. Кум пӧлемым шотыш кондышна, окнам, омсам вашталтышна, методист-влакын пӧлемыштым ачалышна. Кугу мардеж леведышым налын шуэн ыле, тудымат вашталтен шуктышна. У аппарат шерге, садлан тоштыжым тӧрленна. Ынде клубышто пашам ышташ куштылгырак лие, кӧргыжым сылнештарыме деч вара кумылланат ласкан чучеш», — мане тудо. Лидия Платунова мурызо да мурылан сем ден почеламутым возышо автор семын палыме. Репертуарыштыже «Шошо мардеж», «Тыяк веле», «Шочмо кече» да молат улыт. Тылеч посна уста ӱдырамаш сӱретлаш тале. Тудо тыглай карандаш дене портретым сӱретла. «Изинек сӱретлаш йӧратенам. Москошто пашаште ыштыме годым карандаш дене удыркален шинчылтым. Мылам келшыш. Врач да медсестра-влакын портретыштым сӱретлаш тӱҥальым. Вара пырдыжыш пижыктышым. Галерей шочо. Тидым куанен вашлийыныт», — ойла Лидия Платунова.
Эмлызе-влакын чурийыштым шарнаш манын, сӱретче телефон дене нуным чоянрак сниматлен. Вара сайракшым ойырен налын да ош кагазеш сӱретлен. Тыге кажнылан шочмо кечылан изирак пӧлекым ыштен. Кӧм сӱретлен — иктат ӧпкелалтын огыл, чылан ӧрыныт, куаненыт, чурийыштышт куан гына лийын.
Лидиян Валерий пелашыже уста гармонист. Канышлан мӧҥгыжӧ толмыж годым тӱвыра пашашке ушна. Клубышто «Ласка шӱм» ансамбльым студент пагытыштак чумыреныт. Участник-влак гитаре почешат мурат.
Платуновмыт кок йочам ончен куштеныт. Поянсолаште чоҥымо шке суртыштыштышт вашла пагален, йӧратен илат, шочшо, уныка-влакым, родо-тукымым куанен вашлийыт.