13 февральыште С.Г.Чавайн лӱмеш книгагудышто «Марий краевед» клубын 120-шо заседанийже историй науко доктор, профессор К.Н.Сануковын 85 ияш лӱмгечыжлан пӧлеклалтын ыле.
Юбиляр черле улмыжлан кӧра ты вашлиймашыш толын кертын огыл. Актовый залыш пурымаште историй науко доктор, профессор Сануковын возымо пашаже-влакым посна выставкыш чумырымо ыле. Варажым нине книга-влак нерген погынышо еҥ-влаклан МарГУ-со историй да филологий факультетын деканже, историй науко кандидат Алексей Ошаев каласкалыш.
Сануковын школжо
Тений 5 февральыште (ты кечын шочын) Ксенофонт Сануковым И.П.Петровым шарныме лӱмеш «Калык верч тыршымаш» медаль дене наградитленыт. Тудо 2000 ийыште Марий облисполкомын икымше председательже нерген «Председатель исполкома: Очерк жизни и деятельности И.П.Петрова (1893-1938 гг.)» книгам савыктен луктын.
К.Н.Сануков Марий Элын, Юл ден Урал кундем-влакын, тыгак финн-угор калык-влакын историйышт нерген ятыр статьям, монографийым, учебно-методический пособийым савыктен, шуко лӱмлӧ еҥ нерген посна книгаште каласкален. Палыме финноугроведын 900 утла пашаже савыкталтын. Тудын шонымашыж да вуйлатымыж почеш «Марийская биографическая энциклопедия» ош тӱням ужын. Сануков чумыр пашажым «Шочмо эллан служитлем» девиз почеш шуктен.
А эн кугу сеҥымашыжлан шке исторический научный школжым ыштымым шотлыман. Сануковын школжо шочмо нерген икымше гана 2000 ийыште «Национальные отношения и современная государственность» всероссийский семинар-школын материал сборникыштыже ушештарыме. Тидын нерген книгагудышто эртыше заседанийыште Сануковын ик тунемшыже, Т.Евсеев лӱмеш национальный тоштерын кугурак научный пашаеҥже С.К.Свечников, палдарыш. Марий кундемын историйже нерген вашке 912 страницан книга лекме да тушто могай сферылам авалтыме нерген МарГУ-н профессоржо, философий науко доктор А.В.Маслихин каласкалыш. Шке пашашт да Сануковын полышыж шотышто краевед Л.Н.Киртаев ден историй науко кандидат И.А.Андреев радамленыт. А «Марий краевед» клубын заседанийжым тудым вуйлатыше А.М.Клёнов вӱден.
ТИДЫН НЕРГЕН «КУГАРНЯ» газетын 6 мартысе номерыштыштыже лудаш темлена.