Пошкырт кундем Балтач районышто 18 марий ял уло, тушто 1700 наре еҥ ила. Тидыже 12 процент лиеш.
Шукерте огыл Балтач район Кабырга тӱвыра пӧртын «Ӱжара» ансамбльже марий ансамбль-влак дене пырля Марий Элысе «Кугече-Pairem» folk-фестивальыште выступатленыт ыле. А тылеч ончыч 4 майыште нуно Морко район Шеҥше тӱвыра пӧртыштӧ шке мастарлыкыштым ончыктеныт.
«Ме, марий-влак, тӱрлӧ мероприятийыш пырля погынена. Кажне тылзын иктаж-могай да мероприятийым эртарена. Тений «Яндар йӱк» марий муро конкурсым Кабырга ялыште кумшо гана эртарышна. Шукерте огыл Мишкан ялыште почеламутым наизусть лудмо конкурс лие. Районысо марий-влакын национально-автономный рӱдерже Йыванай ялыште верланен. Йыванай школышто у вуйлатыше пашам ышташ тӱҥалын. Кодшо гана Мер Каҥашын шошо сессийышкыже толынна ыле. Тунам Марий книга савыктыш книга пӧлекым пуэн колтышт, нуным школышко намиен пуышым. У тунемме ийыште тушто марий йылмым угыч тунемаш тӱҥалме нерген ойласен келшыме», – ойла Балтач районысо марий-влакын национально-автономный рӱдерым вуйлатыше Пётр Абдулов.
Пётр Салиевич Балтач район шочмо Мата ялыштыже йочасадым 15 ий вуйлатен, тӱвыра сферыште 32 ий пашам ыштен. Сулен налме канышыш лекмеке, мер пашашке эшеат чолган ушнен. Сандене калык тудлан национально-культурный автономийым вуйлаташ ӱшанен.
Пошкырт кундем гыч толшо марий-влак кумылын мутланымашке ушнат. Теве Анфиса Аликаева (снимкыште) пелашыж дене пырля ныл шочшым ончен куштен. Иктыже, эргыже, Йошкар-Олаште ила. Анфиса Шарифьяновна тудым ужде каяш логалеш мо манын ойгыралтен, воктекем лишеме.
Ондак Кабырга тӱвыра пӧрт пелен «Рвезылык» ансамбль лийын. Анфиса кокай тушко коштде кертын огыл, ятыр жап библиотекарьлан пашам ыштен. А ялыште вет кузе – библиотек ден клуб пашаеҥ-влак икте-весыштлан полшен, келшен илат. Варарак ансамбльлан «Ӱжара» лӱмым пуэныт.
Кызыт Кабырга тӱвыра пӧртым Лариса Кузьмина вуйлата. «Ӱжара» ансамбльын участникше-влаккын ятыр мужыр чиемышт уло. Нунылан тӱрлӧ сӧрал вургемым кидмастар Ольга Кирилова урген пуа. Тудын пашажым Унчо кундемыш кондымо изи выставкыштыштат ужна.
Лишыл жапыште (эше кечым палемдыме огыл) Балтач район Мишкан ялыште шочшо да кызыт Йошкар-Олаште илыше марий шанчызе, МарГУ-н доцентше Виталий Тимраевич Михайловын 65 ияш лӱмгечыжым уло ял калык дене тӱвыра пӧртыштӧ эртараш шонат. «Тыгай мероприятий-влаклан кӧра верысе калык лӱмлӧ марий еҥ нерген утларак пален налеш да пагалаш тӱҥалеш», — каласыш П.С.Абдулов.