«Кӱртньӧ – мыйын йолташем», –

ойла Шернур район Кугу Мушко ялыште шочын-кушшо Максим Смоленцев.
Ялыште тудым тале спортсмен семын палат. А кызыт рвезе Санкт-Петербург олаште ила, спортлан тыгак шӱман.
Рвезын иктаж 9-10 ияшыж годым Руслан изаже тудым эрыкан кучедалмаш дене секцийыш наҥгаен. Занятийым тренер, Марий Эл Республикысе спортын да физический культурын сулло пашаеҥже Виталий Гаврилович Шабердин Шернур посёлкысо йоча да самырык спорт школын Кугу Мушко ялысе филиалыштыже эртарен. «Тунам але спортлан шӱман лийын омыл. Моло йоча семын юарлен модын куржталмем шуын, но изам эре пырля коштыктен», – шарналта М.Смоленцев. Иза ден шольо эрыкан кучедалмаш секцийыш ондак пырля коштыныт гын, изажын школым тунем пытарымеке, Максим шкетак кошташ тӱҥалын, спортын кӱлешлыкшым умылен.

Виталий Гаврилович тӱрлӧ приём-влакым туныктен, кучедалме годым кузе да мом ышташ кӱлмым умылтарен. Тыге тренер 2006 ий ноябрьыште Максимым икымше таҥасымашкат ямдылен шуктен. Соревнований Шернур посёлкышто лийын. Самырык спортсмен шке нелытан категорийыштыже кокымшо верыш лектын. Тылеч вара шуко таҥасымашыш миен коштын. «Эн кугу соревнованийыште Ульяновск олаште лийынам»,– ойла Максим.

Шернур посёлкысо 1-ше номеран школым 2014 ийыште тунем пытарымеке, рвезе МарГУ-шко Физикоматематический факультетыш тунемаш пурен. «Университетыште кок ийым тунеммеке, армийыш каенам. 2015-2016 ийлаште Хабаровск крайыште служитленам. Армийыште мыланем чот келшен, контракт почеш кодашат шоненам, но пытартыш жапыште шонымаш вашталтын», – каласыш М.Смоленцев.

Армий деч вара изаже Санкт-Петербург олаш куснаш темлен. Руслан ятыр ий тушто ила да пашам ышта. Тыге 2019 ий январь гыч Максим элнан йӱдвел рӱдолаштыже ила. «Кит» предприятийыште кӱртньыгорно транспорт шкаф-влакым пога. Тыгодым спорт нергенат огеш мондо. Арнялан ныл гана паша деч вара спортклубыш коштеш. 2018 ийыште пауэрлифтинг дене Санкт-Петербург олаште эртаралтше таҥасымаште шке вийжым терген. Тушто икымше верыш лектын.

«Спортклубышто пауэрлифтинг да кроссфит дене мый тренер дене заниматленам: кугу нелытан штанге ден гантель-влакым нӧлтенам. Икманаш, кӱртньӧ – мыйын йолташем. Спортклубышто Миша дене палыме лийынам. Тудак мыланем таҥасымаште вием тергаш темлен», – ойлыш Максим.

Спортлан шӱмаҥше, тудын кӱлешлыкшым умылышо еҥ таза илыш-йӱла деч посна иленжат огеш керт. Тидыже рвезын тазалыкшым пеҥгыдемда, жапым пайдалын эртараш да шке вийжым тӱрлӧ таҥасымаште тергаш полша.

Рвезын альбомжо гыч налме фото.