Денис Березин Кужэҥер район Йӱледӱр селаште шочынкушкын. Тыштак 11 класс марте шинчымашым поген. Урок деч вара спорт дене заниматлен да сӱретлаш йӧратен.
2006 ийыште МарГУ-шко историй да филологий факультетыш историклан тунемаш пурен. «Кӧ лияш шонымем раш пален омыл, а точный науко-влак келшен огытыл, сандене тышке тунемаш пуренам», – каласыш Денис.
Рвезын студент пагытше пеш веселан эртен. Тудо тӱшкагудышто «Марий Эл радион» кызытсе тӱҥ редакторжо Володя Матвеев, Вадим Протасов (шукынжо тудым Санюн Вадик семын палат) дене пырля ик пӧлемыште илен. «Йокрокланен шинчаш жап лийын огыл, рвезе-влак эре мурат, гитарым шоктат ыле. Тыгак Дима шольым дене кеҥежымсе полиатлон секцийыш коштынна. Мемнам Тарих Сафеевич Гильмутдинов тренироватлен», – шарналтыш Д.Березин.
Университетым тунем пытарымеке, рвезым вигак армийыш налыныт. 2011-2012 ийлаште Оренбург областьысе Тоцкое селаште разведбатальонышто служитлен.
«Армийыште лӱйкалымаш, йӱдымсӧ марш-бросок, военный модмаш-влак ушеш кодыныт. Чыла тидыже шучко, но оҥай лийын. Взрыв годым дымовой шашке-влак пудештыныт, а лӱйкалаш яра патрон дене лӱйкалыме. Икманаш, каплан копыж чучын», – каласыш Денис.
Армий деч вара 2012 ийыште самырык рвезе МОСИ-шке юриспруденций направлений дене заочно тунемаш пурен.
2013 ий годсек внутренний службын изирак лейтенантше Денис Березин Суд пристав-влак федеральный службын Йошкар-Оласе управленийыштыже ик суд пӧлкаште суд приставлан пашам ышта. Ты пашаш пураш тудлан йолташыже темлен улмаш.
«Пашаш пурымо деч ончыч ме шкешотан тергымашым эртенна: турникыште нӧлталт кертмынам тергеныт, закон-влакым йодыштыныт. А вара кум тылзе испытательный срок лийын», – ойла рвезе. «Могай сомылым ыштеда?» йодмемлан тудо тыге вашештыш: «Судышто але зданийыште ме порядкылан вуйын шогена. Судыш ӱжмӧ почеш огыт тол гын, нуным кондена. Але, мутлан, вес элла гыч толшо але гражданстве деч посна илыше еҥ-влакым чек марте ужаташ логалеш да тулеч моло пашам шуктена».
Д.Березин изиж годсек футболла модаш йӧрата. Ондак шольыжо дене кугурак-влакын модмыштым онченыт, кушкын шумекышт, шке модаш тӱҥалыныт. Кызытат шке селасе «Искра» командыште модеш, Дима шольыжо – ты командын капитанже. Нуно районышто ятыр гана чемпион лийыныт. А кодшо ий годсек республикысе футбол команде-влакын икымше лигыштышт модыт. Нылымше верыште улыт.
Каныш кечылам Д.Березин йӧн лийме семын ялыште эртараш тырша. Тыгак йолташ-влак дене футболла модаш погынат.
Д.Березинын альбомжо гыч налме фото.