«Кӱлешан улмем шижам»,


– ойла Марий рӱдӧ аварийно-утарыше службын кычалме да утарыме пашам шуктышо отрядшым вуйлатышын алмаштышыже Егор Кузьмин.


Тудо Волжский район Пӧтъял ялеш шочын-кушкын. Изиж годым машиналан шӱман лийын, тачат ты шижмаш йомын огыл. Яра жапше годым эре машинам тӧрла, ачала.

Тысе школышто шинчымашым поген. Физкультурым да физикым йӧратен тунемын. Индешымше класс деч вара Волжск оласе индустриально-технологический техникумын филиалыштыже тракторист-машинист, В,С категориян водитель да электросварщик профессийлам налын.

Налме профессий дене пашам ыштен шуктен омыл, армийыш каенам. Оренбург областьысе реактивно-артиллерийский войскаште служитленам. Армий деч вара водолазлан тунемынам. Изам водолазлан пашам ышта, мыламат тунемаш темлен. Воронеж олаште кум тылзе водолаз-влакым туныктымо курсышто тунемынам. Тунем пытарымеке, Якутийыште «Сила Сибири» магистральный газопроводышто вӱдйымалысе переходым ыштымаште тыршенам. Тушто пашам пытарымеке, мый Марий Элысе утарыше службыш куснаш шонышым. Поисково-спасательный пашам шуктышо отрядым вуйлатышын алмаштышыже лийым. Пашам 2019 ий годсек ыштем. Вигак ты должностьыш налыныт, – ойла Е.Кузьмин.

Икымше паша кечет кузе эртен?

Пашаш 27 декабрьыште, Утарыше-влакын кечын, лектынам. Тунам ик изирак корно туткар гына лийын ыле. Тиде кечын жап пеш писын эртен. А такшым тӱрлӧ пашам ышташ логалеш: чодыраштат, вӱд йымалнат туткарыш логалше еҥым кычалына. Шукерте огыл Кужэҥер районысо ик ялыште кок йочам вӱд йымач лукмо. Тыгак учений-влак эртаралтыт: кодшо кечылаште Карась ерыш миенна.

Учений-влак кузе эртат?

Курсышто чылалан туныктеныт: кузе икымше полышым пуаш, вӱд йымалне шкем кузе кучаш, мо тушто лийын кертеш – умылтареныт. Карась ерыштат вӱд гыч кок еҥ дене але шкет, тыгак аппарат полшымо дене кузе лукман, ученийым эртаренна.

Вӱд йымач айдемым лукташ куштылгыжак огыл вет?

Ондак лӱдмашанрак ыле. Чонлан ньыге-нюго чучын. Кызыт тунемалтын. Айдеме чыла пашалан тунем шуэш. Сомылна шкешотан, неле. Тыгодым цельыш шуат, вес еҥлан сайым ыштет гын, чонлан ласкан чучеш.

Ме палена: утарыше-шамыч икмыняр пашам шуктен кертыт. Тыйын сомылет могай?

Ме чыла тӱрлӧ сомылым шуктена: корно туткар годым утарена, чодыраште кычалына, вӱд йымач луктына. Мемнам тӱрлӧ пашалан туныктеныт, кеч-могай ситуацийыште полшен кертына. Тидлан аттестацийым чӱчкыдын эртена.

Паша куштылго огыл, шуко жапым да ӱнарым налеш. Вес вере каяш шонымаш уке?

Мый шке пашамым йӧратем. Калыклан полшен кертмем, кӱлешан улмем илыш вийым пуат, умбакыжат пашам ышташ кумылаҥдат.

Тыгай аланыште пашам ышташ куштылго огыл, физически веле огыл, психологически чот пеҥгыде лийман. Тыгай кӱлешан да неле пашам шуктымыштлан утарыше-влаклан тауштыман.

Фото-влакым еш альбом гыч налме.

2020 ийыште республикысе пӱялаште кок йоча вӱд йымак каен колен. Кужэҥер район Васалай ялыште 13 ияш рвезе-влак ача-ава деч посна йӱштылаш келыштарыдыме верыште вӱдыш пуреныт. Ийын моштыдымылан кӧра вӱд гыч лектын кертын огытыл.

2019 ийыште ийготыш шудымо ик йоча колен.

2018 ийыште кум йоча вӱд йымак каен.