Йӱдымат ургаш ямде

Анжелика Смоленцева изиж годсек ургаш йӧрата.

Анжелика Кужэҥер район Осыпъялыште шочын-кушкын. Индешымше класс марте Кугу Лаждӱр школышто тунемын. Кыдалаш шинчымашым налаш Шернур районысо Лажъял школыш каен. Тушто школ деч вара ешартыш занятийлаш кодын. Туныктышо Нина Ивановна Кузьмина ӱдыр-влакым ончылшовычым, тувырым, костюм-влакым ургаш туныктен.

Телым поранан игече годымат кум меҥгым пасу гоч ошкылынам. Шкет кодмемат мыйым лӱдыктен огыл: ургаш чот йӧратенам. Авамын самырык годсо тувыржо-влакым шканем келыштаренам. Кидпашалан шӱман улмем ужын, авам куэмым да моло фурнитурым налын пуэн. А ачам мыланем ургымо машинам пӧлеклен. Тунам ургаш кумыл эше ешаралтын, – ойлыш Анжелика.

Школым тунем пытарымыж годым ӱдырлан кумшо разрядан ургызо улмыж нерген свидетельствым кучыктеныт.

2012 ийыште А.Смоленцева Йошкар-Оласе технологический колледжыш конструктор-технологлан тунемаш пурен. Тунамак Интернетыште тӱрлӧ мастер-класс-влакым ончен, вургемым урген.

2015 ийыште колледжым тунем пытарымеке, марлан каен. Ешыж дене Йошкар-Олаште ила. А.Смоленцева налме профессийже дене пашам ыштен шуктен огыл, чыла вере опытан еҥым гына вученыт. Сандене Анжелика мӧҥгыштӧ йолташ ден палымыже-вла — клан вургемым ургаш тӱҥалын. Тыге самырык ургызо деке тӱрлӧ сынан йодмаш дене толшо-влак шукемыныт. Ӱдыр чыла йодмым шуктен, а ыштен налме окса дене ешартыш фурнитурым налын.

2017 ийыште Ангелина ӱдырна шочын. Тудо мыйым тӱрлым ышташ, шонен лукташ тарата. Ӱдыремлан йымал вургем гыч тӱҥалын телымсе кӱжгӧ куртко марте урген чиктем. А вара у вургем дене фотосессийым эртарем. Ешемлан ӱмбал вургемым ургаш эн чот йӧратем. Жап эртыме семын вургем-влакын фотоштым соцсетьлаш вераҥденам. Тӱрлӧ кундем гыч заказ-влак толаш тӱҥальыч, – каласыш Анжелика. Йодмаш шукемын, а жап огеш сите, сандене самырык ава йӱдымат урга.

Шукерте огыл А.Смоленцева кокымшо гана ава лийын, сандене вургем-влакым у шӱлыш дене урга. Кок ӱдыржӧ аваштым у шонымашлан кумылаҥдат.

– Йодмаш-влак ак да кугыт шотышто тӱрлӧ улыт. Тидыже мыйым огеш лӱдыктӧ. Мӧҥгешла, умбакыже шке мастарлыкым вияҥдаш кумылаҥда. Адакшым тыгай паша дене мый шканем шке вуйлатыше улам. Но йодшо шуко улмылан кӧра южгунам каналташ жап уке. Шукыж годым аза-влаклан ургаш йодыт, вара – 3-4 ияш икшыве-влаклан. Тыгак пытартыш жапыште ава ден ӱдыр-влаклан икгай вургемым ургаш йодмаш-влак шукемыныт, – ешарыш ӱдыр.

Анжеликалан ме умбакыжат вияҥаш, у шонымашлам илышыш шыҥдараш да шке моштымашыж дене еҥ-влакым куандараш тыланена!

Еш альбом гыч налме фото-влак.