Кызыт шуко самырык еҥ юрист, экономист профессийым налаш шона гынат, туныктышо профессийым ойырышо-влакат улыт. Теве Йошкар-Олаште шочын-кушшо, изинек марий йылмым сайын палыше рвезе Егор Федоров МарГУ-ш Калыкле тӱвыра да тӱвыра кокласе кыл институтышко марий йылме да литератур специальность дене тунемаш пура.
Рӱдолаште илыше рвезын яндарын марла мутланен колтымыжо öрыктарыш веле огыл, тыгак кугешнымаш кумылым лукто. Вет кызыт олаште шочын-кушшо марий йоча-влак утларакшым рушла мутланат. А тиде рвезе мöҥгыштыжат ача-аваж дене шочмо йылме дене кутыра.
Ача-аваже Морко район гыч улыт. Аваже – Шеҥше села гыч, ачаже – Унчо вел гыч. Ешыште тудо ик йоча. Изиж годсек Шеҥше селашке коча-коваж деке унала коштын да тыге марла сайын мутланаш тунемын. Марий йылмылан Егорым аваже поснак шӱмаҥден. Алевтина Константиновна Йошкар-Оласе Чавайн лӱмеш книгагудын комплектований пöлкаштыже пашам ышта. Ачаже – Андрей Егорович – Моско олашке пашаш кудалыштеш.
Рвезе Йошкар-Оласе 14-ше гимназийыште тунемын. Индеш ий гимназий пеленысе «Шокто, гармонь» ансамбльышке коштын. Тыште 1-ше класс гычак марий йылмым тунемаш тӱҥалын.
«14-ше гимназий – келге шинчымашым пуышо тунемме тöнеж. Ончыч марий йылмым арнялан кок гана тунемына ыле, вара шагатым шагалемденыт. Сандене арнялан ик урок веле лийын. Классыште Анна Атлашкина дене коктын гына марла мутланен моштенна. 5-ше классышке коштмо годым Марий Эл радиош кутыраш ӱжыныт ыле.
Марий йылме – мыйын шочмо йылме. Марла мутланаш ом вожыл. Гимназийыште 8-ше да 9-ше класслаште тунемме годым марий йылме дене олимпиадыште участвоватленам. Ик гана 2-шо вер дене палемдалтынам гын, вес ийын 3-шо верым пуэныт ыле. Йошкар-Олаште эртаралтше Колумб лудмаш конкурсыштат участвоватленам. Рушла, марла, тыгак англичан йылме дене почеламутым сылнын лудын кертам», — ойла рвезе.
Кушко тунемаш пурышашым Егор ончылгоч пален. Сандене вес тунемме заведенийлашке так арам жапым йомдарен коштын огыл. А вигак приемный комиссийышке толын, Калыкле тӱвыра да тӱвыра кокласе кыл институтышко документшым намиен пуэн.
«Тышке тунемаш пураш руш йылме, обществознаний дене ЕГЭ-м сдатленам. Тиддеч посна 19 июльышто творческий экзаменым кученам. Ме 4 теме гыч иктым ойырен налын, сочиненийым возышаш улына ыле. Сылнымут теме дене кылдалтше сочиненийым возенам. Результатым вашке палдарышаш улыт. Группышто мый дечем посна эше ик рвезе тунемаш йодмашым пуэн.
Марий йылме да литератур специальность деч посна тыште эше ешартыш шинчымашым налаш лиеш. Журналист лияш да радиошто пашам ышташ кумыл уло», — ойла Егор.
Шукерте огыл Унчо селаште черетан Самырык тукым слёт эртаралте. Егор тиде слётышко тений икымше гана миен, тушто шуко у йолташым муын, чылажат чот келшен. Садлан вес ийынат тыгай слётышко каяш шонымашыже уло.
Рвезын волгыдо шинчаончалтышыж гыч шочмо йылмым йöратымым, тудын ончыкылык пӱрымашыж верч чон йӱлымыжым шижаш, ужаш лие. Егор марий йылмым келгын тунемаш шона. Вет шуко марий самырык еҥ мöҥгешла марла огыл, рушла мутланаш тырша. Поснак олашке толын «рушаҥын» шинчыт. Но кеч мыняр рушла мутлане, капыште садак марий вӱр коштеш. Сандене самырык-влак коклаште Егор гай еҥ-влак утларак лийыт гын, шочмо йылмына нигунам ок йом. Йылмына ынже кавыске, умбакыжымат тӱзланыже, аралалтше манын, ончыкылык тукымлан гына ӱшан кодеш.