Марий самырык театрын артисткыже Галина Соловьеван сценыште оҥайын койын моштымыжым театрым йӧратыше-влак шукынжо ужын шуктеныт, шонем. Тений 1 апрельыште «Воштылаш, товатат, сулык огыл!» конкурсышто ттудо шкенжым вӱдышӧ семын тергыш. Артистке тыгай пашам икымше гана шуктен, мутат уке, тургыжланен. Ты сомылын ойыртемжым, нелытшым шижын да умылен шуктен. Вет артист тунем толмо шомакшым веле сценыште ойла, а вӱдышӧ кеч-могай жапыште программыште вашталтышлан ямде лийшаш. Туге гынат Галиналан тидыже пайдале лийын да, шкеж манмыжла, «экзаменым кучен кертын».
Галина изиж годым туныктышо лияш шонен илен, 7-ше класс марте тетла вес шонымаш вуйжым аҥыртылын огыл. А вара артист кумылжо почылтын да туныктышо семынат койын. «Школ гыч толмеке (а тудо Звенигово район Чакмарийыште тунемын), ӱстембаке тетрадь-влакым шарен оптем, кугу пӱкеным шындем, кидышкем журналым кучем. Тунам ача-авамлан каласенам: «Мый телевизорышто улам, тыланда увер-влакым ойлем. Школышто сценкылаште модынам, кидпашалан тунемынам, ик жап хорышто муренам», — ойла Галина.
Артист лияш шонымаш шочмеке, ӱдыр марий йылмым да литературым туныктышо А.А.Андреевалан «Мый артист лийнем» манын ойлен. Тудо Йошкар-Олашке тӱвыра да сымыктыш колледжыш каяш темлен. Туныктышо экзаменлан мурым, басне-влакым ойырен налаш полшен. Школышто кузе тунеммыж нерген йодмемлан математике дене «окшаклымыжым» ойлыш.
Ешыште куд йоча лийын. Эн изиже – Галина. Ӱдыр рвезе койышанрак кушкын, ныл ийлан кугурак Колюш изаже дене пырля футболла модын. Иктаж-куш модаш каяш манын, пӧрт ончыко лу наре йоча толын, «Коля!» кычкырен. Вара ик жап гыч Галям тыге ӱжын наҥгаеныт. «Мо тый атаманша улат мо? Тый дечет посна огеш лий мо?» — ойлен ачаже.
Г.Соловьева Изи Моламас гыч Чакмарий школыш пасу гоч куржталыштын. Лавырам тошкен, поран ваштареш каен, йӱштыштӧ кылмен, вичкыж мардежым чытен… Ик меҥгым чӱчкыдынак йолташ ӱдыржӧ дене пырля ошкылыныт. Южгунам шошым да шыжым асфальт дене йыр коштыныт. Икана трассыш кугу лум чумыркам оптен кайымыштлан водитель деч лач Галялан шолдыра шомак логалын.
Изирак капшылан кӧра Галям мыскылышат лектын. Йочаж годым ӱдыр тидын верч чот тургыжланен. «Изи огыл, миниатюрный улат. Тыйым эре йӧраташ тӱҥалыт», — лыпландареныт ача-аваже, акаже-влак. А кызыт гын нимогай удам огеш шиж, вет артисткылан роль шотышто тетла сайрак, ӱдырым, йочам, самырык геройым ончыкташ да йомакысе персонаж-влакым модаш пуат. Тудым «палочка-выручалочка» манашат лиеш. Теве «Чодыраял Элыксандр» спектакльыште ик герой – Илюш — эрге йоча. А кодшо гана тудым ӱдыр икшывыш, Танюшыш, савыреныт да Галиналан модаш ӱшаненыт. «Изи капан от лий гын, мый йӧратенат ом шынде ыле докан», — куандарен ойла келшыме рвезыже.
Умбакыже «Кугарня» газетыште (2019 ий 7 июньысо номерыште) лудса.
