Икымше врач ден фармацевт-влак

2014 ийыште МарГУ-што Медицине да естественный науко институтым почыныт. Тушко «Лечебное дело» направлений дене икымше гана студент-влакым погеныт. Тений 50 врачлан да 22 фармацевтлан кӱшыл шинчымашым налме нерген дипломым кучыктеныт.

Тылеч ончыч медицине образованийым Йошкар-Оласе медколледжыште веле пуэныт. Сандене кӱшыл шинчымашым налаш манын, шукынжо вес олалаш тунемаш каеныт. Кызыт ты институтышто «Лечебное дело» да «Педиатрий» направлений дене специалист-влакым ямдылат. Бюджет вер шукемын: 80 еҥ оксам тӱлыде тунемын кертеш.