Икымше пашадар дене фотоаппаратым налын

Тачысе лаштыкнан геройжо – Алексей Алабужин. Тудо Йошкар-Оласе ик заводышто пашам ышта, а каныш кечылаште чонлан келшыше пашалан – фотосъёмкылан – жапым ойыра.

Алексей Йошкар-Олаште шочын-кушкын. 28-ше №-ан лицейыште тунемын, вара ПГТУ-со механике да машиностроений институтышто «машиностроений» направлений дене шинчымашым поген. Кызыт тиде специальность денак магистратурышто тунемеш да пашам ышта.

Рвезе изиж годымак инженер лияш шонен. Паша оҥай, шкешотан манын иктешлымашым ыштен. «Кызытсе жаплан механик профессий кӱлешан. Паша вер уло, шкаланат машиностроений нерген палаш кӱлеш», – шонымаш дене А.Алабужин университетыш тунемаш пурен.

Алексей, инженер профессийым налаш шонышо рвезе кузе фотограф лияш кумылаҥын?

Школышто тунемме годымак телефонысо камерыш пӱртӱсым войзаш йӧратенам. Икымше курсым тунем пытарымеке, кеҥеж жапыште пашам ыштенам. Пашадарым поген, 30000 теҥгеаш фотоаппаратым налынам. 2017 ийыште, пашам ышташ куштылго да йӧнан лийже манын, кӱлеш оборудованийым налын шуктенам. Тиде ийынак Волагтехыште «МедиаПорт» студент организацийым ыштеныт. Тидыже студент-влакын шкешотан медиа-службышт лийын. Мыйымат тушко ӱжыныт. Организацийым чумырымеке, чыланыштым тӱрлӧ курслаште туныктеныт. Мый пел ий гыч фотограф курсым тунем лектым. Мероприятийлаште фотограф сомылым шуктенам.

2018-2019 ийлаште ПГТУ-што «Продвижение» форум эртаралтын. Тунам тудо участник-влак коклаште самырык фотограф конкуренцийым шижын. Умбакыжат тидлан тунемаш кумылаҥын.

Умбакыже 24 январьыште лекше газетын 4-ше лаштыкыштыже лудса.