Икымше гана

Тений декабрьыште Йошкар-Оласе 10-шо номеран «Звёздочка» йочасадыште икымше гана марий пайрем эртаралтын. 

Тыште шым марий воспитатель пашам ышта. Рӱдоласе йочасадлаште марий йылмым ынде икмыняр ий огыт туныкто. Тылеч вара тыште марий пайрем-влакым эртарымат огыл. Тидым шотыш налын, воспитатель-влак йоча-влакым марий йылмылан шӱмаҥдаш манын, нунылан почеламутым туныктеныт да конкурсым эртареныт.

Йочасадысе 11 группо гыч почеламутым сылнын лудын моштышо кок йоча дене ойыреныт. Тыге 22 йоча конкурсышто участвоватлен.

«Поэзий аршаш» мероприятийлан сценарийым Е.А.Романова ден З.Е.Щербакова ямдыленыт да вӱденыт. Мероприятийым тӱрлӧ марий модыш, муро, презентаций дене сӧрастареныт. Поэзий пайремым ончыкыжымат эртараш кутырен келшеныт.