Кажне ийын шошым, эҥерлаште да ерлаште ий шулымо пагытыште, элыштына я ик вере, я вес вере айдемын ий йымак кайымыж нерген ойган увер шокта. Тыгодым воктене лӱддымӧ да чолга утарыше еҥ лектеш гын, айдемын илышыжым жапыштыже арален кодаш лиеш. Лач тыгаяк случай ӱмаште Йошкар-Олаште лийын – ий йымак йоча логалын. Пиалешыже, тораште огыл самырык рвезе, Максим Туреев, эртен каен.
2019 ий 14 апрельыште Максим Эшкинин уремыш келшыме ӱдыржӧ дене вашлияш вашкен. Театральный кӱвар дене ошкылмыж годым рвезе Изи Какшан эҥер воктене еҥ-влакын ончен шогымыштым ужын. Мо лийын ончалаш манын, рвезе лишкырак куржын миен.
«Тушто ужым: вӱдыштӧ – йоча. Тудо ий йымак каен, вӱд гыч лекташ тӧча. Ончен шогышо-влак деч «Рвезе вӱдыштӧ, колен кертеш, мом вучеда?» – манын йодым. «Утарыше-влакым вучена», – вашештышт нуно. Мый тыманмеш кӱртньӧ савар гоч тӧрштен вончышым, серыш волышым. Тудо верыште сер моткоч тура, адакшым пеш яклака ыле. Кӱшнӧ ончен шогышо-влак мый декем иктын-иктын волаш тӱҥальыч, кидым ваш-ваш кучен, цепочкым ыштышна. Тиде жапыште рвезе ий ӱмбак кӱзен шогалын ыле, ийже сер деч иктаж метрат пеле тораште лийын. Мый тудлан кидем шуялтышымат «Тӧрштӧ!» манын кычкыральым. Рвезе икмыняр йолтошкалтышым шеҥгеке ыштышат, тӧрштыш. Мый тудым шокшыж гыч кучен шуктышым, рвезе адак вӱдышкӧ пуреҥгайыш. Тунамак шокшыж гыч кучен, вӱд гыч шупшын луктым да воктенем шогышылан рвезым шуялтышым. Тыге ик кид гыч весыш пуэден, рвезым лукна. Тиде жапыште МЧС машина толын шуо», — каласкалаш тӱҥале Максим.
Тый айдемым утаренат. Тиде подвигет нерген иктаж-кӧлан каласенат манын йодмемлан рвезе тыгерак вашештыш:
«Рвезым вӱд гыч лукмеке, мый нигӧлан нимом ойлыде мый умбакыже ошкыльым. Такше тудо случайым подвиглан ом шотло, вет вес семынже лийынат кертын огыл. Тудо жапыште вуйышто ик шонымаш гына пӧрдын: йочам утараш!»
Каласыман, Максим вӱд гыч йочам ик гана веле огыл утарен. Икана йолташ-влак дене пырля йӱштылаш мийымыж годым эҥерын вес серыштыже канаш толшо кугыеҥ-влакын кочывӱдым подылмыштым ужын. Пеленышт йоча лийын. Изи икшывын йӱштылмыжым Максим шуко жап эскерен. Кенета тудо вӱд йымалне йомын. Йочам утараш манын, рвезе, шуко шоныде вӱдыш тӧрштен. Йочан йолжо эҥер пундашыште кийыше укшеш пижын улмаш. Максим ӧрмалген огыл, писын гына изи йочан йолжым мучыштарен да тудым серыш луктын. Тыге самырык рвезе эше ик илышым утарен.
Максим Йошкар-Олаште шочын-кушкын, 21-ше №-ан школышто тунемын. Шымше класс деч вара Нижнекамск олаш Татарстанысе кадет корпусыш тунемаш каен. Пытарымекыже, Озаҥ оласе танковый училищыш тунемаш пураш йодмашым возен, но балл ситыдымылан кӧра тушко логалын огыл. Ик ий ямдылалтмеке, рвезе уэш Озаҥ олаш кудалеш да тиде гана экзаменым сайын куча. Тыге тудын йоча годсо шонымашыже шукталтеш.
Максим школыштак спортым йӧратен, утларакшым тудо куржталын. Кадет корпусыш тунемаш пурымекыже, иймаш да лӱйкалымаш дене заниматлаш тӱҥалын. Кызытат рвезе спортлан шӱман, но жапым ынде утларакшым военно-прикладной спорт налеш. Туге гынат Максимын шуко наградыже уло. Военно-прикладной спорт дене тудо вич гана икымше лийын, шым гана кокымшо вер дене палемдалтын. Российысе военно-спортивный организаций ден кадет корпус-влакын 2017 ийысе сбор гыч вич шӧртньӧ да вич ший медаль дене пӧртылын. «Кадет Приволжья» кадет-влакын слётыштышт кокымшо лийын.
Максим – тыматле койыш-шоктышан рвезе. Айдемым утарыме нерген йодмем годым вожылынрак ӱлыкӧ ончале. Шижалтеш, рвезе тиде случайым, чынжымак, подвиглан огеш шотло. Тыге ышташ тудлан чонжо кӱштен.