Гитар озажым муын

Какшан сер ӱмбалне

14 июньышто кастене «Кугарня» газет редакций Изи Какшан эҥер сер воктене (Йошкар-Оласе Амстердам набережный , 1-ше номеран пӧрт) ончылно «Какшан сер ӱмбалне» авторский муро фестивальым кокымшо гана эртарен. Тӱҥ шонымашыже: бард мурым пропагандироватлаш. Кӧ тугай бард? Тиде –  поэт-мурызо, шукыж годым шке почеламутыштлан возымо мурым мура. А ме фестиваль годым икмыняр номинацийым темленна. Гитар але моло семӱзгар дене шоктышо, мурышо, тыгак фонограмме почеш шке мурыштлан возымо мурым мурышо-влакым ӱжынна. Пайремнам фестивальлан лӱмын возымо «Ах, Какшан» (мутшо ден семже Алёна Яковлеван) муро дене почынна.  Тыге волгыдо кава йымалне, вӱд толкын дене лӱналтме семын, сылне муро йонгалте. Кеч-могай номер дене выступатлыме годым почеламутын але семын авторжо лийшаш. Номинаций-влак : «Шке шоктышо да мурышо ( бард) », «Семӱзгар шоктымо почеш мурышо», «Фонограмме почеш мурышо автор», «Дуэт», «Ансамбль-влак», «Кумылаҥдыше приз»  лийыныт.  Фестивальыш  Чуваший Республикысе, Пошкырт кундемысе да Марий Эл республикысе икмыняр районла гыч участник-влак толыныт. Эн ондак Чебоксар ола гыч  Олег Ильин, Виктория Семенова-Захарова, Яков Федоров толыныт. Вара Пошкырт вел гыч «Эрвел чинче» ден «Шӱдыргорно» ансамбль-влак ушнышт. Эн кугу делегаций Волжский район гыч лийын. Самодеятельный композитор Вячеслав Осиповын вуйлатыме «Чевер кече» ансамбль чыла гаяк номинацийыште усталыкшым ончыкташ толын.  Тыге поро унам вашлиймылак, ӱстел чесым погенна. Икте почеш вес конкурсант-влак чумыргышт,  чылаштым вучен шуктышна да Изи Какшан сер воктеке лекна. Организатор-влакын шонымышт семынак,  фестиваль марий тӱвырам, шочмо йылмым арален кодаш да талантан  молодежьым сылнымутлан, сылнысемлан  шӱмаҥдаш, бард муро  вийым налже манын ышталтын. Ончыкыжым регионыштат, Российыштат эртаралтше фестиваль ден кункурслаште мемнан артистна-влакат мастарлыкыштым ончыкташ лектышт манын шонена. Кызытсе бард-мурызо-влак деч самырык у  автор-влак  тунемышт, икте-весышт дене палыме лийышт, кӱкшытыш шуышт.

Жюри председатель бард Геннадий Григорьев лийын. Тудо тыге ойлыш: «Фестиваль годым военно-патриотический, гражданский,  лирике, илыш нерген шонкалымаш  тематикылан  тӱткышым ойырымо, шоктымо годым тӱҥ семӱзгар гитар лийшаш. Фольклор ден эстраде жанр деч бард палынак ойыртемалтеш, садлан  кажне участник палышаш: номер-влак фестивальын йодмашыжлан, положенийжылан келшен толшаш улыт».  Чынак, авторский  муро-влак,  шӱм-чон гыч лектын, уш-акылым пойдарат, пуртӱсын, шке шижмашын вийыштым ушен, илышым келгын  умылаш туныктат. Кунам тыгай мурым колыштат, шӱм-чон  сандалык дене вашкылым ышта:  я куатым шижат, я лыпланет.  Жюриште тыгак О.Ипай лӱмеш премийын лауреатше-влак мурызо Светлана Яндукова ден поэтессе Татьяна Пчёлкина лийыныт.

Икымше верым  «Шке шоктышо да мурышо (бард)» номинацийыште Геннадий Куклин (Йошкар-Ола), кокымшым  Руслан Никифоров (Морко район), кумшым  Алексей Тихонов ( Параньга район) налыныт. «Семӱзгар почеш мурышо» номинацийыште Чебоксар ола гыч Олег Ильин, Виктория Семенова-Захарова, Яков Федоров лийыныт. «Фонограмме почеш мурышо автор» номинацийыште икымше верым Валерий Чивановлан (Йошкар-Ола), кокымшым Валентина Егоровалан (Морко район), кумшым  Любовь Орловалан (Провой вел) пуымо, «Дуэт» номинацийыште икымше вер Валерий Петров ден Руслан Никифоровлан логалын, кокымшо – Ольга Якимова ден Александр Мамаевлан ( Йошкар-Ола). Кумшо вер лийын огыл.  «Ансамбль-влак» номинацийыште «Шӱдыргорно» ( Нефтекамск ола) икымше, «Чевер кече»  (Волжский район) кокымшо, «Эрвел чинче» (Пошкырт кундем. Калтаса район) кумшо верлаште лийыныт.

Гран-прим – гитарым –  Морко район гыч Валерий Петровлан кучыктеныт. Тудын лӱмжӧ марий тӱняште мурызо, бард, «Шуматкече» ансамбльын солистше  да семмастар семын палыме. Валерий самырык тукымлан пример, тудо рвезе-влакым гитар дене шокташ туныктен шога. Жюри тыге палемден: «Гитар шке озажым муын». Кажне участниклан фестивальын свидетельствыжым кучыктенна, сеҥыше-влаклан — шергакан пӧлекым!

Валерий Петров у гитар дене ончаш толшо-влаклан  «Муралтем Морко вел муро семым» мурым пӧлеклыш.

Участник-влакын списокыштым ончалаш темлена: 1. Александр Мамаев, Ольга Якимова (гитар)
2. Анатолий Ильин (гитар)
3. Алевтина Баязитова (Башкирий) («Эрвел чинче»ансамбль)
4. Валерий Петров (гитар)
5. Виктория Семёнова-Захарова (Чуваший), гитара+баян
6. Евгений Иванов (фонограмме.)
7. Галина Яндулова ден Василий Васильев (гармонь)
8. Константин Шемякин  (гитар)
9. «Шӱдыргорно» ансамбль (Башкирий)
10. Валентина ден Валентин Булыгинмыт (гитар)
11. Руслан Никифоров, Валерий Петров (гитар+гармонь)
12. Валентина Егорова (гитар)
13. Валерий Чиванов (фонограмме.)
14. Геннадий Куклин (гитар)
15. Любовь Орлова (фонограмме.)
16. Алексей Тихонов (гитар)
17. Вячеслав Осиповын командыже ( «Чевер кече» ансамбль).
18. Руслан Никифоров (гитар)
19. Валентина Егорова (фонограмме.)
20. Валерий Александров (гитар)

Пайрем, чынак, кумылым авалтен, кажне еҥын шӱмышкыжӧ могай-гынат чӱчалтыш вий-куатым ешарен.