Марий эстрадыште кызыт гармонь дене шоктышо да мурышо-влак шукын огытыл, но улыт. Нунын кокла гыч иктыже – Параньга район Усола ялын шочшыжо Александр Лопкин.
2017 ийыште гармонь дене шоктышо, такмакым мурышо кугурак капан рвезым калык порын вашлие. Кугу сценышке лекмыж дене тудын лӱмжӧ шукылан палыме лие. Уста гармоньчым тӱрлӧ яллашке концерт дене выступатлаш, сӱаныш ӱжаш тӱҥалыныт. Гармоньчо туге шокталта, туге семым савырал шында, шулен колыштмет гына огыл, кушталтыметат шуэш. А семӱзгар кидыштыже модеш веле.
А.Лопкин кумдан палыме, пагалыме еҥ лияш манын огыл, а чон йодмо почеш шокташ тӱҥалын. Тыгодым музыкальный шинчымашыжат лийын, семӱзгарланат кидше толын. Изиж годсек усталык шӱлышан кушшо эргыжым аваже Вера Анатольевна Йошкар-Оласе талантан йоча-влаклан президент школ-интернатышке тунемаш пуэн. Лач тыште самырык рвезе семӱзгарым кидышкыже кучен, профессионально шокташ тунемын. Баян, гармонь кидше гыч ойырленыт огыл.
«Жапыштыже авамат тыштак тунемын. Тудо Параньга посёлкысо йоча музыкальный школын директоржо. Тыгак Усола клуб пеленысе «Мур пеледыш» ансамбльын художественный вуйлатышыжлан ышта. Школ-интернатыште 1-ше гыч 7-ше класс марте тунемынам. Тыште семӱзгар дене шоктенна, куштенна, тыгак хорышто муренна. Вара Усола школышто тунемаш тӱҥалынам. 9-ше класс деч вара И.С. Палантай лӱмеш тӱвыра да сымыктыш колледжышке «Народное инструментальное творчество» пӧлкашке тунемаш пуренам. Лач тыште мастарлыкем утларак нӧлтенам. Могай гына семӱзгар дене шоктен огынал!. Гармонь, балалайке, кӱсле, шӱвыр дене шоктенна, тӱмыр дене перкаленна. Ныл ий гыч дипломым нальым да армийышке кайышым.
«Мураш от тӱҥал мо?» – Мый дечем ик гана огыл йодыныт. «Мураш мурызо омыл, но шоктен моштем», – вашеш эре ойленам. Ала мурен ончышаш манын шоналтышым. Мурен ончышым, еҥ-влаклан келшыш. Вара тугак кайыш. Муро-влакем такмак сынан улыт. Сандене икымше мурем «Такмак-влак» маналтын. Пелыж наре калыкын, вес пелыжым шке ешарен возенам. «Чот шокталтем гармонемым!» кокымшо мурем шуко еҥлан келшыш. Семже – Медведево велын, мутшо – калыкын да шкемын. Тудым вигак Марий Эл радиош пуышым. Кызыт репертуарыштем 4 муро уло. Чон йодмо почеш шоктем. Кӧлан келша – колыштыт, шонем. Концертлашке, гастрольлашке ӱжыт гын, тугеже мурымем, шоктымем йӧратат. Поснак сӱанлашке эре ӱжыт. Чыла вере лийынам, лач Юрино районышко гына миен шуын омыл. Военный оркестрыште пашам ыштымем дене гастрольышко пешыже каен ом керт. Киров, Татарстан велышке гына миенам» – ойла Александр.
«Кажне еҥ мастарлыкшым терген ончышаш», – мане рвезе. Чонет мо верч йÿлен ила – тудым кöргыштö шылтыман огыл, а почман. Поснак марий эстрадыште шуко у мурызо-влакын сценыш лекмышт тудым куандара. Тидыже пытартыш ийлаште чот палдырна. Ончычсо ийла дене таҥастарымаште кызыт шуко у мурым радио дене колаш лиеш.
Паша шуко гынат, А.Лопкин кертмыж семын яра жапше годым мӧҥгыштыжат кидышке гармоньым налын, сылне семым луктеш.
Усола ялыште шочын-кушшо рвезе шÿм пелашым Шернур велне вашлийын. Марина дене пырля ик эргым ончен куштат. Сергей 11 ийым темен.
Параньга велне марий-влак татар-шамыч дене ваш келшен илат. Тыште марий-влак виян койыш-шоктышан, чолга, уста улыт. Александр Лопкинымат ты радамышке пуртыман. Рвезе кугу сценышке лекташ лӱдын, ӧрын огеш шого. Весела, мыскара сынан мурыжо-влак дене шуко еҥын кумылжым налын мошта.