Шукерте огыл Йошкар-Олаште 2006-2007 ийлаште шочшо рвезе-влак коклаште футбол дене «Времена года» турнир эртаралтын. Тушто пӧръеҥ команде-влак ваштареш кок составан «ZARA» ӱдыр команде модын. Коктыжат призовой верым налын кертын. Тачысе номерыштына ӱдыр-влаклан «ZARA» футбол школ нерген тудын директоржо Александра Викторовна Запевалова дене мутланышна. 24 ияш ӱдыр ончыч футбол дене Марий Элын сборныйыштыжо модын, «Мариэлочка» командын футболисткыже лийын.
– Александра Викторовна, «ZARA» школ кунам почылтын?
– Школна ӱмаште февральыште шочын. Йошкар-Олаште ӱдыр-влаклан тиде – икымше футбол школ. Мемнан деке ола гыч веле огыл, тыгак Медведево да Оршанке районла гыч 5-16 ияш ӱдыр-влак коштыт. Тылеч посна Испанийыште шочшо Йоланда да США-ште шочшо Майя лӱман ӱдыр-влак футболла модыт. Тӱрлӧ амллан кӧра ӱдыр-влакын ешышт Марий Элыш илаш кусненыт.
Республикыште ӱдырамаш футболым вияҥден колтымо шуэш. Лачак тыгай шонымаш дене школым йолташем да коллегем, футбол дене Российын спорт мастерже, «Мариэлочка» футбол командын ончычсо капитанже Анастасия Рауфовна Рахматуллина дене коктын почна. Йоча-влак дене паша опытна лийын. Ме Медведево посёлкысо «Витязь» йоча футбол клубышто тренерлан пашам ыштенна.
– Ӱдыр-влак коклаште футболла модаш кумылан-влак тугеже шукын улыт?
– Ситышын. Изирак ӱдыр-влакым мемнан деке ача-авашт кондат гын, кугурак-влак шкеак толыт. Кызытеш школышкына 50 наре подростко коштеш. Но ме футболым йӧратыше кумылан ӱдыр-влакым кеч-могай жапыште налаш ямде улына. Спортын ты видше шуко ӱнарым, писылыкым йодеш. Садлан тренировкылаште спортсмен-влак деч уло моштымыштым да вийыштым ончыкташ йодына.
– 50 наре ӱдыр дене тренировкым мыняр еҥ эртара?
– Ийготым шотыш налын, ныл группылан шелме. Чылаже школышто кок тренер Анастасия Рауфовна Рахматуллина ден Сергей Витальевич Пегенеев, футболистке-влакым ямдыла. Мый тренерын полышкалышыже улам.
– Идалык веле пашам ыштеда. Могай йӧным кучылтын, шкендан дене ача-ава-влакым, йоча-шамычым, моло спорт школым вуйатыше-шамычым палдареда?
– Инстаграм, Вконтакте соцсетьлаште «ZARA» ӱдырамаш футбол школын группыжо уло. Информационный полышлан ме эре куанена.
– Турнирлаш кошташ, тӱрлӧ экипировкым налаш оксам те шкеак ойыреда?
– Спорт сооружений-влакым арендоватлаш шергын шуэш. Арняште тренировкым кум гана эртарена. Лишыл жапыште вич тренировкым ыштена. Тренировкым кеҥежым оласе ик стадионышто эртарыме гын, сентябрьыште «Спартак» ФОК-ын спортзалышкыже кошташ тӱҥалман. А тудлан шагал огыл оксам тӱлыман. Садлан мыланна спонсор-влак чотак кӱлыт. Школна ача-ава-влакын окса полышышт дене ила.
– Тунемшыда-влак сеҥымашышт дене чӱчкыдын куандарат?
– Ӱдыр-влак тӱрлӧ койыш-шоктышан улыт. Южгунам ӱскыртланен кертыт. Садлан тренер кажне йочан шӱм-чонышкыжо корным муын моштышаш. Футболисткына-влак тале улыт. Поснак Диана Сидоркина мемнам эреак куандарен. Тудо школнан 2004-2005 ийлаште шочшо ӱдыр командынан капитанже лийын. Тений Моско область Звенигород оласе 2-шо номеран Олимпийский резерв училищыш тунемаш пурен. Туддене кугешнена да ӱшанена, футбол карьерыже сай лиеш. Пеш тыматле ӱдыр. Тыгодым футболла модмо годым тудо лидер койышыжым, уста футболистке улмыжым ончыктен мошта.
– Лишыл жапыште могай чемпионатыш каяш ямдылалтыда?
– 4 сентябрьыште «Мариэлочка» ден «ZARA» командын кугурак ийготан спортсменкыже-влак Мордовийысе Ковылкино олашке каена. Тушто «Юл кундем федеральный округ» этапыште кокымшо дивизионысо ӱдырамаш команде-влакын первенствышт эртаралтеш.
14 августышто «Единый Россий» партийын регионысо пӧлкажын еҥже-влак «Арена Марий Эл» футбол да куштылго атлетике манежыште «Дворовый футбол» фестивальын регионысо этапшым эртарен. Тушто мемнан 12-13 ияш футболисткына-влак сеҥеныт да ынде сентябрь кыдалне Санкт-Петербургышто федеральный этапыште модаш тӱҥалыт.